Andecha denuncia un “xuiciu farsa” contra una militante

Andecha Astur calificó de “montaxe políticu-policial” al xuiciu que’l prósimu vienres 15 va facese-y a una militante de la organización. El supuestu delitu foi intentar facer una entruga a la cabezalera d’UPyD, Rosa Díez, nun actu públicu.

El Club de Prensa de La Nueva España d’Uviéu foi l’escenariu nel que Rosa Díez, cabezalera del partíu nacionalista estañola Unión Progreso y Democracia (UPyD), taba dando una conferencia pública cuando una militante d’Andecha llevantó la mano pa face-y una entruga.

Enantes d’entruga-y, según declara Andecha nun comunicáu de prensa, la militante “foi sacada pola fuerza de la sala y llevada a comisaría onde permaneció más de dos hores retenida”. Tres d’esto, l’afectada presentó un informe mélicu de mancadures y una denuncia por detención illegal que foi archivada.

“Pa xustificar esti actu facista, UPyD presentó una denuncia enllena de falsedaes onde s’acusa de coaccion a la nuestra militante”, denuncia Andecha yá que, según UPyD, la moza independentista taba enfilada y drogada, insultó y amenazó nel actu y s’alcontraba acompañada d’unes venti persones qu’esperaben insultando a Rosa Díez nel esterior.

Movilización
“Si intentar facer una entruga nun actu públicu de Rosa Díez ye tan peligrosu, podemos facenos una idega del calter facista d’esti partíu ultranacionalista español” sentencia Andecha Astur, que llama a movilizase’l prósimu vienres 15 a les 11.30, nuna concentración delantre de los xulgaos de Llamaquique d’Uviéu.