Andecha celebra un actu pa recordar la declaración de soberanía del Conseyu d’Asturies y Lleón

El pasáu 24 d’agostu cumpliéronse 74 años de la declaración de soberanía del Conseyu d’Asturies y Lleón. Andecha Astur, pa conmemorar esta fecha, celebra’l sábadu un actu d’alcordanza en Brañillín.
 
D’esta forma, la formación nacionalista pasa a celebrar esti aniversariu nel puertu Payares tres facer dellos años l’actu en Xixón delantre de la que fora sede del Conseyu Soberanu pa depués treslladalu a Tarna, “un llugar mui simbólicu de la resistencia asturiana contra’l facismu”. Asina, los dos años últimos, el conceyu de Casu acoyó esti eventu. Inclusive, Andecha Astur instaló un monolitu onde colocó una placa n’alcordanza del Conseyu Soberanu, dalgo que va repetir en Ḷḷena pa recordar “a los homes y muyeres que defendieron neses montañes una Asturies llibre y socialista”.
 
L’actividá de la xornada va principiar pela mañana. A les 10 hores va celebrase una actividá complementaria consistente nuna xubida al picu Cellón (2.026 metros), “una de les cumes emblemátiques d’esti sector de la Cordillera y que foi murniu escenariu de los combates na defensa d’Asturies”. L’actu políticu va tener llugar a les 14 hores y nél van intervenir los voceros de la formación nacionalista. Pa zarrar la xornada, los asistentes al actu d’alcordanza d’esta fecha histórica pal país van disfrutar d’una espicha popular.