Andecha Astur y Izquierda Asturiana van dir en coalición a les elecciones del mes de mayu xunto con Los Verdes-Grupu Verde

Les formaciones polítiques Andecha Astur, Izquierda Asturiana (IAS) y Los Verdes-Grupu Verde, dieron anuncia esta mañana de que van dir en coalición a les próximes elecciones del mes de mayu. La llista conxunta, que va presentase col nome de "Unidá" quier ser "una alternativa real y ilusionante en clave nacionalista asturiana d'izquierda y ecoloxista a les actuales polítiques de PSOE-IX y PP".

L'alcuerdu pa les elecciones autonómiques amiéstase al que yá fixeren públicu les formaciones nacionalistes IAS y AA va poques selmanes p'acudir a les elecciones a conceyos, amestándose agora al mesmu la formación "Los Verdes - Grupu Verde" partíu que nun tien rellación con "Los Verdes d'Asturies" que van dir a les elecciones xunto con Izquierda Xunida - Bloque por Asturies. El comunicáu en que se presenta la coalición sorraya que en "Los Verdes-Grupu Verde" inxértense "dellos exmilitantes de Los Verdes d'Asturies que nun taben conformes col pautu de la so formación con IX, amás d'otros miembros de colectivos vecinales y ecoloxistes".

El secretariu xeneral d'Izquierda Asturiana (IAS), Faustino Zapico, el Secretariu d'Organización d'Andecha Astur, Germán Abad, y la representante de Los Verdes-Grupu Verde, Rosanna Rodríguez roblaron un alcuerdu que llevó "selmanes de negociación" y que va llevar a que les trés formaciones presenten llistes conxuntes nes trés circunscripciones electorales asturianes. La coalición, qu'entovía nun tien designáu candidatu a la presidencia d'Asturies, va llamase "Unidá" una palabra que va siguise de les sigles de les trés formaciones. La llista quier ufiertá-y a la sociedá asturiana un "proyectu alternativu a les polítiques inoperantes y negatives no económico,depredadores col mediu ambiente y contraries a la identidá asturiana qu'aplicaron PSOE y PP nos socesivos gobiernos de los últimos años" y que suponga tamién una "alternativa real" al "asturianismu y ecoloxismu impostáu d'IX que, cuando toca gobernar, demuestren que nun son más qu'una muleta del PSOE".

Los exes programáticos y los nomes de los candidatos de la coalición "van dase a conocer en pocos díes", según se da anuncia nel comunicáu de presentación de la candidatura anque yá se adelanta que nos mesmos "va tener gran importancia la defensa de la cultura asturiana, el derechu de Asturias a decidir el so futuru, la defensa d'un modelu social, económicu y ecolóxicu basáu na xusticia social y les polítiques sostenibles, lo mesmo que les alternatives que faigan desapaecer les actuales polítiques que condenen a la mocedá a la emigración, y qu'estrocen el nuestru patrimoniu natural y cultural.