Andecha Astur tamién refuga la Llei Orgánica d’Enseñanza

La organización política nacionalista Andecha Astur emitió ayeri un comunicáu de prensa nel que fai pública la so refuga dafechu a la Llei Orgánica d'Enseñanza que va votase en Congresu de los Diputaos y contra la que tan convocaes güei un total de cuatro actos de protesta por una plataforma qu'axunta a catorce organizaciones distintes. El partíu políticu sorraya nel so comunicáu la falta de dimensión asturiana de la LOE a la qu'acusa de "perpetuar la conceoción centralista del sistema educativu nel Estáu español, torgando la esistencia d'una Escuela Pública Asturiana" al empar que con ello "torga la posibilidá de qu'Asturies tenga un sistema educativu propiu qu'arrespuenda a les necesidaes colectives del nuestru país y que-y dea puxu a la nuestra realidá nacional, social y cultural".

El caltenimientu de los conciertos educativos que se contempla na llei ye otru de los puntos que llamenta AA, que diz que la LOE "ye'l garante d'un sistema educativu duple que-yos va permitir a les empreses particulares d'enseñu recibir entá más dineru públicu". Otros puntos de la crítica d'AA son que la LOE "refugue un enseñu llaicu" y "qu'afonde na segregación social al siguir permitiendo la llibertá pa escoyer centru que permite que los colexos particulares concertaos sigan esbillando'l so escolináu".