Andecha Astur reclama la dimisión de l’alcaldesa de Llanes

La formación nacionalista apunta a Antonio Trevín, ex alcalde de Llanes, y a la primer edil actual, Dolores Álvarez Campillo, como culpables de les consecuencies graves que tien pal conceyu l’anulación del PXOU. Andecha pide la dimisión de l’alcaldesa.
 
P’Andecha Astur, la sentencia del Tribunal Supremu que torna’l recursu impuestu pol Gobiernu y el Conceyu de Llanes contra’l fallu del Tribunal Superior de Xusticia d’Asturies (TSXA) qu’anulaba nel 2007 el Plan Xeneral d’Ordenación Urbana (PXOU) de Llanes, ye “una victoria más na llarga llucha contra la vergonzosa especulación urbanística y el despotismu en Llanes qu’Andecha Astur y otres organizaciones vecinales y ecoloxistes llevamos calteniendo mientres décades”, señalen dende la formación na so páxina web. El partíu nacionalista “celebra la sentencia del Tribunal Supremu” y pide “la dimisión  inmediata de l’alcaldesa poles consecuencies económiques, urbanístiques y sociales graves que van trayer les sos irregularidaes y intereses”. Amás, reclama a Antonio Trevín, delegáu actual del Gobiernu estatal n’Asturies y alcalde de Llanes nos periodos 1987-1993 y 1999-2004, “qu’asuma la so responsabilidá y dé la cara nesti asuntu”.
 
Tres el fallu del Tribunal Supremu, que se conoció ayeri, Andecha Astur anunció que “va estudiar la sentencia a fondu colos sos servicios xurídicos y les posibles aiciones xudiciales a tomar” en feches próximes. Hai que recordar que la sentencia del TSXA vino tres un recursu interpuestu por Andecha Astur contra los alcuerdos adoptaos sobre'l PXOU de Llanes pola Comisión d'Urbanismu y Ordenación del Territoriu d'Asturies (CUOTA) en xunetu del 2002 y abril del 2003.
 
Otra manera, l’Asociación de Vecinos y Amigos de Llanes (Avall), que tien interpuestu otru recursu ante’l Tribunal Supremu qu’aborda aspectos más amplios del PXOU, tamién reclamó la dimisión de Dolores Álvares Campillo.