Día del Llibru Asturianu

Andecha Astur presenta una denuncia contra UXT en Bruxeles énte la OLAF

|
Paulo Arboleya, Pernardo Barrena y Mario Arbesú na OLAF

L'eurodiputáu d'Agora Repúbliques, el vascu Pernando Barrena, acompañó a la delegación del partíu asturianu desplazada a Bélxica.

Andecha Astur ta acabante de denunciar a la Unión Xeneral de Trabayadores (UXT) "por presuntu usu fraudulentu de los fondos europeos de formación pal emplegu, pidiendo al mesmu tiempu la suspensión cautelar de cualisquier sovención" al sindicatu énte la Office Européen de Lutte Anti-Fraude (OLAF), entidá de la Xunión Europea (XE) encargada d'enfrentar la corrupción. Paulo Arboleya, secretariu xeneral de la formación nacionalista, y Mario Arbesú, miembru de la Xunta Executiva Nacional, entregaron na sede de la OLAF, asitiada en Bruxeles, una bayurosa documentación xunto a la demanda.

"Falamos de cómo un sindicatu, que nin ye asturianu nin socialista, apropióse presuntamente de más de 1’4 millones d’euros provinientes de fondos europeos destinaos a formación pal emplegu n’Asturies, ello ye, destinaos fundamentalmente a que los paraos y paraes asturianes meyoraren les sos posibilidaes d’emplegu", critiquen dende Andecha Astur, qu'asegura qu'UXT "tien n’Asturies un entramáu d’empreses pantalla y fundaciones que-y permitieron elevar la facturación y evitar los controles, provocando un gran quebrantu a les arques públiques". Al empar, nun quier dexar de recordar los otros munchos casos de corrupción qu’afeuten a Asturies: "los casos Riopedre-PSOE, Villa-SOMA, Niemeyer, El Musel, Aquagest, etc.".

Na so visita a Bruxeles, Arboleya y Arbesú tuvieron acompañaos pol eurodiputáu Barrena, d'EH Bildu. Dambes formaciones formen parte de la coalición Agora Repúbliques, formada tamién pol Bloque Nacionalista Galego (BNG), Puyalón de Cuchas, Ahora Canarias y Esquerra Republicana de Catalunya (ERC), que cuenta con dos escaños del Parllamentu Européu.

Otra manera, los dos representantes d'Andecha Astur aprovecharon la so estancia en Bruxeles pa participar nuna concentración "en defensa de los presos políticos catalanes".

Na semeya, Arboleya, Barrena y Arbesú na puerta de la sede de la OLAF.

 

Contador Estadistiques