Andecha Astur esixe que se remocique un monumentu del sieglu XVI

La organización nacionalista Andecha Astur emitió un comunicáu nel que denuncia'l deterioru y l'amenaza de ruina que pesen sobre'l palaciu de les Torres de Donlebún en Castropol. Esti exemplu de l'arquitectura civil del sieglu XVI tien catalogación como monumentu, pero la titularidá particular del mesmu llenda les posibilidaes d'actuación pa recuperalu y caltenelu.

Nun escritu presentáu na Casa Conceyu de Castropol, el partíu nacionalista encamienta a l'alministración a entamar midíes urxentes pa la recuperación del monumentu, pa lo que reclama que'l conceyu obligue a los propietarios a actuar nel palaciu o que'l mesmu conceyu actue d'oficiu declarando'l remocique forzosu de les torres. Como encontu llegal pa l'acción al favor del edificiu, Andecha Astur cita un encamientu de la Comisión de Patrimoniu del Principáu con fecha de marzu del 2002 nel que se-yos recuerden a los propietarios les sos obligaciones col monumentu acordies cola llei sobre Bienes d'Interés Cultural, ello al empar que recuerda Andecha Astur como nel conceyu de Ribedeva l'alcaldía entamó un espediente de rehabilitación forzosa d'otru monumentu de la edá moderna en manes particulares, la Torre de Noriega.