Andecha Astur d’Avilés refuga la térmica

L'agrupación del partíu políticu Andecha Astur d'Avilés dio anuncia de la presentación en Ministeriu de Mediu Ambiente d'un documentu d'alegaciones énte la posible construcción d'una central térmica de ciclu combináu de gas en Valliniello, conceyu d'Avilés, amestándose a les alegaciones que yá presentare la Coordinadora Ecoloxista d'Avilés a esta térmica, actualmente en fase de consulta previa a la Evaluación d'Impactu Ambiental.

Les llinies xenerales de les alegaciones d'Andecha Astur d'Avilés tiénense en trés separtaos; d'una parte les repercusiones negatives pa la salú que diba tener la térmica que quier asitiase en Valliniello y qu'afectaríen a 16 conceyos espardíos nun radiu de venti kilómetros, dando más riesgu d'enfermedaes ente la población, sobremanera respiratories; d'otra les repercusiones negatives pal mediu ambiente, desapaeciendo gran parte del esfuerzu de recuperación de la contaminada Ría d'Avilés col calecimientu que diba sufrir l'agua de la mesma n'echando a andar la térmica; a la fin Andecha apunta a los factores económicos negativos de la térmica, rellacionaos p'Andecha Astur d'Avilés en primer llugar cola perda del equipamientu cultural especial que proyectaba la Conseyería de Cultura en Valliniello y pal que tenía acutada una partida de nueve millones d'euros, ello a cambéu de la construcción d'una central térmica que l'agrupación nacionalista diz que nun diba crear más de diez puestos de trabayu directos y arriendes del impactu qu'esta nueva central diba tener sobre los planes de desarrollu urbanísticu y turísticu que ta llevando alantre'l conceyu.