Andecha Astur acudió al congresu fundacional de Sortu n'Iruña

Esti sábadu tuvo llugar n’Iruña’l congresu fundacional de Sortu, nel que salió escoyíu Hasier Harraiz como primer presidente de la formación abertzale. Andecha Astur unvió una delegación a Euskal Herria p’afitar les sos rellaciones internacionales.

Según informó’l partíu nacionalista, el congresu resultó “un ésitu en cuantes a organización, participación y conteníos” y sirvió pa dar a conocer la realidá asturiana entes les munches delegaciones internacionales desplazaes a Iruña pa participar nel ‘Sortzaile’. “Nunos casos teníen una probe conocencia d'Asturies y n’otros, cenciellamente, inoraben la so esistencia,  lo que confirma una vuelta más la importancia que tien l'afitar la estaya de trabayu internacional”, afirmen dende Andecha Astur. La representación asturiana, formada por miembros de la Xunta Executiva, intervino na conferencia sobre los estremaos conflictos políticos que tuvo llugar el vienres y el sábadu unvió un saludu internacionalista y solidariu.

Sortu trátase d’una formación política encuadrada dientro de la izquierda abertzale que tien na so fueya de ruta incorporase a la coalición EH Bildu, de la que forma parte nel Parllamentu vascu’l presidente escoyíu’l sábadu n’Iruña, Harraiz. Nel congresu tamién se decidió qu’Arnaldo Otegi, ex voceru de Batasuna, ocupe’l cargu de secretariu xeneral de Sortu cuando salga de prisión.