Anabel Santiago canta "Al son de la lluna"

Va tiempu que se falaba d'esti discu; el resultáu ye un interesante proyeutu qu'axunto a un bon númberu de músicos y escritores col envís d'arropar la voz de la cantante de tonada Anabel Santiago.



"Al son de la lluna" ye una propuesta editada por "L'Aguañaz" que quier abrir nuevos caminos a la música asturiana. Les novedaes son delles, nun s'usa solo la gaita p'acompañar la voz de la cantante, alcontramos a Xuan Nel Expósito colos curdiones, a Diego Pangua nes gaites y les xiblates, Ramón G. Morán pon los teclaos, Roberto Díaz "Tana" na batería y nes percusiones, amás de los productores del discu, Sergio Rodríguez y Rubén Bada, qu'aportaron les programaciones, vigulinos, guitarres y baxu. Tamién collaboraron voces como la de Xosé Ambás, qu'echa una danza con Anabel en "Cantar del home solu", y Marta Elola en "Señaldá" que ye una gallegada mui especial.



Non solo cambia lo qu'acompaña a la cantante, tamién la propia cantante atrévese con estilos diferentes, vaqueiraes, dances, incluso en dellos temes avérase a un estilu pop, que por supuestu, nun tamos avezaos a topar en discos de cantantes de tonada. Les lletres de los cantares son toes d'escritores d'anguaño, quitando'l bonus track, "Coyí d'un artu una flor", que ya pudimos escuchar nel discu de la Xunta Moza "L'Asturianu vive la llucha sigue". Los escritores son xente tan conocío como Xuan Bello, Inaciu Llope, Pablo Antón Marín Estrada...etc.



Con too y con ello, nel discu tamién hai sitiu pa tonaes cantaes siguiendo l'estilu tradicional, anque con pequeñes variaciones, "Asturies", "Amor quien te tuviera" y "Coyí d'artu una flor" son un exemplu d'ello.



La calidá de la voz d 'Anabel Santiago ye indiscutible, agora queda esperar como van recibir los aficionaos a la canción asturiana esta novedosa y arriesgada propuesta. Si queréis facevos ya col discu podéis mercalu na nuestra nuestra de productos asturianos.