Ana Rosa Migoya diz que la TV “nun va facer de menos l’asturianu”

El discursu de la Conseyera de Cultura Ana Rosa Migoya inauguró oficialmente esta mañana los actos de la XXVI Selmana de les Lletres Asturianes.

La Conseyera faló n'asturianu pa inaugurar una selmana de les lletres que definió como "de cambiu de rumbu" al dedicase a una xeneración y un movimientu y non a un autor en concreto. Ana Rosa Migoya emponderó'l llabor d'estos poetes de los que dixo que "tan llogrando la reconocencia dientro y fuera d'Asturies" a la llingua asturiana.

La titular de cultura aprovechóla ocasión pa facer un repás de los llogros en materia de política llingüística del so executivu. Migoya definió'l gobiernu asturianu como "plural" y de consensu" en rellación al tema llingüísticu, y reconoció que l'asturianu ye "una realidá que fai falta apoyar porque sabemos que ta en peligru y porque trátase del respetu a una parte importante de la ciudadanía d'Asturies que ve nél una fonte de derechos".

Ente los finxos de la so actuación Migoya acutó un bon cachu pa referise al llabor de la Xunta de Toponimia que calificó de "acontecimientu mui esperáu" mientres que la oficialización de los primeros topónimos supón pa Migoya daqué de "significáu históricu qu'acaba con frustraciones de va venti años". El repás a l'actuación de la Xunta de Toponimia de la Conseyera incluyó recáu a les crítiques al llabor de la mesma, y Migoya alvirtió que "la Conseyería de Cultura nun va permitir que delles actuaciones institucionalmente irregulares intenten enllordiar un trabayu mui queríu polos asturianistes y pola xente de los nuestros Conceyos".

Migoya remembró la xuba de les dotaciones presupuestaries en toles estayes de la política llingüística, les campañes de matriculación na enseñanza o los cursos pa la formación de periodistes ente otros avances nel añu últimu. La Conseyera tamién tuvo un intre pa falar en gallego-asturianu, refiriéndose al especial interés por "tratar esta realidá llingüística cola mesma dignidá que l'asturianu".

L'anuncia más importante respective a futures actuaciones en materia de llingua asturiana que fizo esta mañana Ana Rosa Migoya foi na que faló sobre la presencia del asturianu na futura TV autonómica. Pa Migoya, el gobiernu "asume que l'asturianu tien que s'utilizar" na canal autonómica y dixo que diba ser "inconcebible" que la futura TV pública "ficiere de menos" l'asturianu. Sicasí, el discursu de la conseyera evitó falar de porcentaxes nin hores d'emisión.

Migoya, que peslló la so intervención con un poema de Lourdes Álvarez, resumió'l llabor del gobiernu asturianu en política llingüística como "un esfuerzu induldable pa cambiar les coses a meyor" que "solamente aquellos que militen nel negativismu frustrante puen tapecer"