Ana Rosa Migoya diz que la TV autonómica podría echar a andar a últimos del 2.004

Ana Rosa Migoya presentó ayeri en rueda de prensa el conteníu del presupuestu de la Conseyería de Cultura pal añu 2.004, que la Conseyera definió como presupuestu axustáu y que tuvo de redactase mandándose pola mengua del gastu. Ello ye que ente los cerca de 90 millones d'euros de presupuestu colos que va contar la conseyería nel 2.004, los proyectos estrella van ser, per una parte, l'ampliación del Muséu de Belles Artes, que la conseyera sorrayó que diba ser l'actuación más importante del añu y que namás ta pendiente de la espropiación del númberu 12 de la Cai de la Rua, depués de que nun sellegare a un alcuerdu colos propietarios. En materia de museos, tamién va rematase'l Muséu Xurásicu en Colunga . Con cargu a los Fondos Mineros, los grandes proyectos van tar nel entamu de les obres pa la estación d'esquí n'Ayer (parque de les "Fuentes d'Inviernu") y la creación del Complexu Deportivu Cultural de Llangréu. Nel ámbetu de les escavaciones arqueolóxiques y la conservación del patrimoniu, cerca de 5 millones d'euros van dir pal Plan Director de la Catedral d'Uviéu, que va centrase nel exerciciu 2004 en remocicar los retablos de la catedral, recibiendo tamién un sofitu importante la recuperación de les obres en monesteriu de San Pelayo. Les intervenciones arqueolóxiques más importantes van tar nel plan de la cuenca del Navia y el plan arqueolóxicu del Oriente, nel que la conseyera destacó un mayor esfuerzu nes escavaciones del Sidrón.

Sicasí, el puntu más interesante a tratar na rueda de prensa yera'l de la TV autonómica, que depende de la estaya de promoción cultural, que ye la que tien el presupuestu más grande. Ana Rosa Migoya dixo que la canal autonómica del Principáu podía tar funcionando pal últimu trimestre del 2004, pa lo que ta prevista una partida presupuestaria de 7,5 millones d'euros.

No que cinca a Política Llingüística, Ana Rosa Migoya dixo que la partida con cargu al Plan de Normalización diba ser mayor que lo que se presupuestare en rellación a promoción del asturianu nel exerciciu 2.003, mientres que'l presupuestu de l'Academia de la Llingua va ser de 220.000 euros, sobre 36 millones de les antigües pesetes