Ana Rosa Migoya afirma que la oficialidá implica obligación

La Conseyera de Cultura y portavoz del Gobiernu Ana Rosa Migoya aseguró esti fin de selmana nuna entrevista que-y concedió al periódicu de Xixón "El Comercio" que la FSA-PSOE nun se plantea conceder l'estatus de llingua oficial al asturianu na reforma del estatutu d'autonomía en cuantes qu'ello significa una obligatoriedá que la FSA "nun ta dimpuesta a asumir". Migoya afitó la que ye postura del PSOE na cuestión llingüística dende va meses y punxó'l tope nel reconocimientu al asturianu na promoción y difusión de la llingua, dalgo que defendió que se ta faciendo dende'l gobiernu, pero matizó que la "oficialidá ye un estatus xurídicu con implicaciones más complexes que supón obligación de conocimientu y uso, mientras que lo que defende la FSA pasa pela voluntariedá d'usu y aprendizaxe. Entrugada pola posibilidá de qu'IX esixa la oficialidá pa repitir pautu de gobiernu, Migoya dixo qu'ello ye un futurible col que nun se trabaya dende la FSA, que va facer por llograr la mayoría absoluta y nun precisar de pautos.