Ana Cano condenó’l posibilismu y afitó l’asturianidá del Navia-Eo

Nel so Discursu institucional del Día de les Lletres Asturianes, que se celebró esti vienres 5 de mayu, la presidenta de l'Academia de la llingua Ana Cano fizo un llamáu encesu a l reconocimientu de la oficialidá como únicu mediu pa llograr la dignificación del asturianu, declarando la solidaridá de l'ALLA "coles organizaciones y coleutivos sociales que siguen reclamando con enfotu'l llogru de la oficialidá" alvirtiendo al empar de que l'ALLA quería "retrucar tamién argumentalmente aquelles postures que, diciéndose favoratibles a la recuperación de la llingua asturiana, renuncien de mano a siguir lluchando pola oficialidá, plantegando una nueva doctrina que dalgunos llamen posibilista". Pa l'ALLA la cuestión plantégase ente'l tou o la nada", afitando que l'ALLA quier "el tou" y ellos confórmense cola "nada" resumiendo que "frente al posibilismu, l'Academia namái considera una única posibilidá: la oficialidá de la llingua hestórica del pueblu asturianu".

Nun día de les Lletres celebráu nel Teatru Filarmónica en cuenta del tradicional marcu del Campoamor y marcáu pol recibimientu na institución al nuevu académicu, l'escritor de A Roda Manuel García Galano, Ana Cano, que fizo una parte de la so interevención na "fala", declaró que "l'Academia entiende l'eonaviegu como la llingua propia d'esi territoriu, u habrá ser oficial al empar que lo seya l'asturianu en toa Asturies; y qu'enxamás renunciará a la asturianidá de los conceyos nél asitiaos" . Nesti sentíu, la presidenta de la institución aseguró que "l'Academia persabe que dellos sectores minoritarios asturianos o, meyor, dellos asturianos taríen dispuestos a asumir la galleguización llingüística y cultural del territoriu d'Entrambasauguas como tributu a pagar p'alagamar una hipotética oficialidá de la llinguia asturiana" afitando la postura a la escontra de la institución académica en cuantes que l'ALLA entiende Asturies "como una unidá histórica, social, política y cultural incuestionable".

L'actu institucional de l'ALLA tuvo precedíu pola tradicional manifestación reivindicativa de la oficialidá del asturianu convocada pola Xunta pola Defensa de la Llingua Asturiana y na que participaron mas de 2.000 persones.

Ver el discursu completu