Ana Botella compara'l franquismu con ochobre del 34 y Fernando Lastra llámala "facha"

La segunda teniente y conceyala de Mediu Ambiente de Madrid, Ana Botella, aseguró ayeri nun tener problema en condenar el franquismu pero dixo que'l PSOE "nun fizo lo mesmo col güelpe al Gobiernu llexítimamente constituyíu de la Segunda República nel 1934" en referncia a la revolución asturiana d'ochobre d'aquel añu. En declaraciones a Punto Radio, la muyer del ex presidente José María Aznar declaró que'l debate sobre la memoria histórica ye "destructivu y inútil", y alvirtió que "en tolos partíos, hai persones que foron franquistes nel so momentu" anque aclariando "yo nunca fui franquista".



Les declaraciones de Botella repercutieron n'Asturies, onde'l portavoz del grupu parlamentariu del PSOE na Xunta Xeneral Fernando Lastra, calificó a Ana Botella directamente de "auténtica facha" y retrucó a les sos declaraciones puntualizando que la Llei de Memoria Histórica ye "un reconocimientu de dignidá hacia la memoria, de los que nunca tuvieron voz, nin plaques, nin cais nin reconocimientu" fecha "ensin revanchismu" pero que fai que rescampla "una enorme resistencia por parte d'aquellos a los que-yos paez bien el franquismu".



Tamién dende files izquierdistes el portavoz nacional del Bloque por Asturies (BA) Rafael Palacios calificó les declaraciones de Botella de propies d'una "mente enferma" y recordó que'l franquismu "foi una dictadura fascista, mientres que les fuelgues mineres del 1934 n'Asturies foron un movimientu obreru que s'enfrentó a una parte de la república que derivaba hacia'l fascismu pa dignificar los derechos de los trabayadores".