An dro alredor del mundu y pasta, too puede pasar

Pocos díes queden de festival, l’actividá de la delegación asturiana va amernogando, pero con poco que se rasca inda se ven coses por ver y facer, ayeri batir records del mundu, baillar un ska o comer dalgo de pasta foron dalgunes de les ocupaciones.

La cosa va dando la vuelta, y en cuenta de tar saludando xente que ta acabantes de llegar a la ciudá, toca dir despidiendo a participantes que yá acabaron col llabor intercélticu y qu’adulces en coche o en ferry van tornando pa casa, quedando la xera, perimportante, de recordar y contar les anécdotes de viaxe, anque escúchase muncho per equí una adaptación del dichu del estáu de Nevada que diz, lo que pasa en Lorient queda en Lorient.

La cosa va dando la vuelta, pero queda tovía bastante por facer. Asina ayeri’l día foi intensu. Llacín y Xeitu volvíen a participar na quinta, y cabera, Nuit Interceltique, nueches espectaculares pero tamién cansaes ya incluso peligroses, porque la lluvia en Bretaña tien pase permanente, y baillar sobre un escenariu húmedu un pericote necesitaría de prebes d’adherencia dignes de la F1, y sinón que-y lo digan a la bailladora gallega que rompió una pierna nel espectáculu.

Skama la Rede teníen la responsabilidá de facer rock y ska astur nun festival domináu pol folk y la música tradicional. Ayeri tuvieron la oportunidá, cumpliendo dafechu nel escenariu Quai de la Bretagne, xunta una banda escocesa y otra córnica. Casi a la mesma hora que los del Cabu Peñes tocaben, taben nel escenariu de Espace Marine “Breizh Asturies Project”, grupu formáu por músicos bretones que cunta cola participación de Clara y Lorena, dos asturianes residentes en Bretaña que ponen la voz con temes asturianos que la banda encárgase a d’adaptar al son de la música bretona, y sobre too al de la Fest Noz, la fiesta más popular en Bretaña. Y ye qu’ayeri en Lorient celebrábase la inclusión de la Fest Noz como Patrimoniu Mundial pola UNESCO, y pa eso xuntaron a varios de los nomes más importantes de la música bretona. Erik Marchand, Hamon Martin Quintet, los hermanos Guichen, Startijenn…etc. Alredor de 5.000 persones baillando pa cellebrar el reconocimientu de la cultura tradicional y actual, y que quixo poner la guinda nel pastel faciendo el An Dro (danza) más grande del mundu baillando a varies ciudaes del mundu la vez a les 00:00 la nueche.

La nueche acabó con una cita yá tradicional nel FIL, la que se llama la fiesta de los italianos. Y ye que los de la bota ufiertan pasta, grappa y bon humor y muncha folixa pa estrechar amistá con asturianos y gallegos, pa una posible entrada futura del país alpín nel festival.