Amuesa de folclor en Tinéu

L'occidente asturianu tira pola cultura asturiana, si va una selmana presentábase l'agrupación de la Xunta pola Defensa de la L.lingua Asturiana en Tinéu, esti sábadu día 18 va haber una Amuesa de Folclor tradicional, ellí Mari Luz Cristobal va cantar dalgunos temes del so nuevu discu.

El Conceyu de Tinéu, xunta la "Escuela d'Área Tradicional" y l'asociación de pás y mas d'esta Área, entama esta II Muestra de Folclor. Ellí van tar delles formes d'entender la música del país que pasen por pequeños grupos de folk, bandines, grupos de baille y cantantes de tonada. De mano van actuar los de casa, ellí va tar la propia escuela del conceyu p'amosar el so trabayu. El tríu formáu por Xosé Ambás na voz, Elías García col bouzouki y Pepín de Muñalén na xiblata, "Tuenda", tamién va participar na muestra. Amosando lo que ye una bandina tradicional va tar "El cocu la mazana", grupín entamáu pol percusionista y curdioneru David Varela xunta'l gaiteru de Xixón Llorián García. El grupu de baille "Escontra'l Raigañu" tamién va participar na muestra, onde tamién va tar la zanfona de Celia González Baschwitz que va presentar el so primer discu que va presentase d'equí a poco. P'acabar tamién va actuar otra persona que va sacar discu, la cantante de tonada Mari Luz Cristobal Caunedo va cantar dalgunos de los cantares que van tar nel so próximo discu que ta preparando.

Pa prebar tou esti menú musical hai qu'averase hasta Tinéu esti sábadu 18, concretamente hasta'l cine "Marvi" a les 19:00, la entrada ye llibre.