“‘Amor y deséu en tiempos virales’ son poemes escritos nun momentu d’esaltación emocional”, rellata García López

‘Apurémonos a querenos’ ye’l versu que, cuenta María Esther García López, meyor resume ‘Amor y deséu en tiempos virales’. Tratáse del nuevu poemariu de la escritora valdesana, compuestu por nueve “poemes escritos nun momentu d’esaltación emocional”, que presenta esti xueves en Piedrasblancas.

Pata Negra edita esti llibru, que cuenta con dos formatos: ún artísticu y otru, billingüe, estándar. El primeru, con una tirada de namái 30 exemplares numberaos, ta fechu a mano con papel especial y cuenta con seis grabaos orixinales d’arte abstractu obra d’Enrique Tirador qu’acompañen a los poemes y un prólogu d’Aurelio González Ovies de títulu ‘Tres de la ventana’.

“Nel confinamientu y pandemia fixi un poemariu, del qu’argayen estos nueve poemes”, rellata García López. “‘Amor y deséu en tiempos virales’ son poemes escritos nun momentu d’esaltación emocional, nel qu’había necesidá d’aire, abrazos y allegría, de vivir tolo que se podía”, añade la escritora, que recuerda que nesi tiempu tamién sufrió la perda de la so madre, anque puntualiza que non de COVID-19.

‘Imaxina I’, ‘Imaxina II’, ‘Velea’, ‘Mieu’, ‘Llibertá’, ‘Deséu’, ‘Diariu’, ‘Ortográficu’ y ‘Abrazu’ “son poemes d’amor. L’amor y la lluz caminen de la mano y l’amor alimenta la vida a cualquier edá”, rescampla la de La Degoḷḷada.

Nueve poemes que foron de los primeros d’un poemariu más estensu, inéditu, que vamos poder conocer próximamente. De momentu, ‘Amor y deséu en tiempos virales’ yá ta a disposición de tolos llectores y va presentase esta tarde, a les 19.30 hores, nel Valey Centru Cultural de Castrillón, actu con presencia de l’alcaldesa Yasmina Triguero nel que van tar tomar la pallabra xunto a García López, l’editor Fermín Santos y González Ovies, que va facer la función de presentador.

Na semeya superior, García López y Tirador esta mañana nel institutu de Grau.