Amnistía Internacional píde-y a Areces que faiga polos derechos humanos na China

La selmana qu'entra'l Presidente del executivu asturianu va entamar una visita oficial a la China. Con motivu d'esta visita, la sección asturiana d'Amnistía Internacional fízó-y llegar al presidente asturianu un cartafueyu de reivindicaciones en materia de derechos humanos que la organización internacional quier qu'Areces apurra a les autoridaes chines.

Amnistía Internacional diz que ye evidente que la China ofrez oportunidaes de negociu pa les empreses asturianes, un fechu que nun ha tapecer que tan acabante de facese 16 años de la violenta represión de les manifestaciones al favor de la democracia en Tiananmen, la nueche de 3 al 4 de xunu de 1989.

La reivindicación concreta qu'AI quier que tresllade Areces a les autoridaes chines ye la de la lliberación de dos presos de conciencia encarcelaos n'agostu del 2004 por unviar información al estranxeru sobre la represión a les ilesies protestantes en China. AI quier qu'Areces lleve esta solicitú énte les autoridaes de Zhejiang, la provincia que va visitará la delegación asturiana. Amnistía Internacional aprovecha tamién la ocasión pa mostrar el so esmolecimientu pol fechu de que mientres China va camín de facese una gran potencia global, ello nun repercute nel so papel na defensa de los Derechos Humanos.