Amnistía Internacional denuncia'l peor ataque contra los Derechos Humanos en 50 años

La sección asturiana d'Amnistía Internacional presenta a les ocho d'esta tarde nel Centru Municipal d'Arte y Esposiciones de L'Arbolón d'Avilés l'informe añal de la organización sobre'l cumplimientu de los Derechos Humanos.

L'informe añal d'Amnistía Internacional presentóse la otra selmana a nivel mundial, xenerando abondos titulares na prensa poles sos durísimes conclusiones, y ye que p'Amnistía Internacional el cumplimientu y el respetu a los Derechos Humanos tan nel peor momentu dende los años de la Segunda Guerra Mundial. Amnistía condena nel informe la mentalidá que tan faciendo propia los gobiernos de bien d'estaos de "sacrificar los valores mundiales de los derechos humanos nuna busca ciega de seguridá" . AI ve qu'esta mentalidá caltrió dafechu nos Estaos Uníos y qu'agora ta esportándose a otros llugares del mundu.

Evidentemente, l'actuación d'Estaos Uníos n'Irak ocupa un volume curiosu de páxines nel informe d'Amnistía, pero tamién lleven un cachu curiosu les opiniones de la organización sobre otros dos grandes estaos, como son Rusia y China.

Nel casu rusu, l'informe sorraya los ataques indiscriminaos de les fuerces ruses en Chechenia, mientres que la organización aprecia que China, ún de los países onde más s'aplica la pena de muerte, evolucionó en dellos aspectos, pero nun s'esforzó por desaniciar los métodos de tortura qu'empleguen les fuerces del estáu. En cuantes al Oriente Próximu, AI repárte-yos palos a Israel y a l'Autoridá Nacional Palestina por atentar escontra los derechos humanos, anque los calificativos son más duros pa la parte israelina, acusada de cometer "crimes de guerra"

Los organismos supraestatales tienen una de les peores valoraciones de la historia por parte d'AI, que ve que la ONU, que nun gorgutó énte'l conflictu n'Iraq, quedó desacreditada pola facilidá qu'aparentemente tienen les grandes potencies pa caciplar nella y pola "incapacidá" que tien pa imponer les sos decisiones a los países miembros.

L'informe d'Amnistía Internacional pue consultase enteru na web de la organización, onde tamién pue descargase' vídeo que s'amiesta por primer vegada al informe.