Amnistía Internacional recuerda que la salú, la educación y la vivienda “son derechos de les persones”

Amnistía Internacional Asturies espresó’l so esmolecimientu polos recortes y recordó al Gobiernu que la salú, la educación y la vivienda “son derechos de les persones”. Reclamó tamién el mantenimientu de la Procuradora Xeneral.
 
N’opinión d’Amnistía Internacional (AI), les midíes d’austeridá impulsaes dende Madrid y recoyíes poles comunidaes autónomes suponen una mengua nos derechos humanos. “En consonancia coles recomendaciones del Comité de Derechos Económicos, Sociales y Culturales de Naciones Xuníes, Amnistía Internacional pide al Gobiernu d’Asturies que cualquier recorte que s’acometa vaya precedíu d’un informe del impautu que podríen tener estes midíes sobre los coleutivos más vulnerables”, señalen dende la organización, que tamién solicita a los grupos parllamentarios de la Xunta Xeneral “qu’exerzan un control rigurosu al Gobiernu nesti asuntu”.
 
“La salú, la educación y la vivienda nun son sólo servicios sociales, sinón derechos de les persones”, recuerda AI, que destaca la importancia “de que los derechos económicos, sociales y culturales sían esixibles ante la xusticia nel casu de sían violaos”. “Les autoridades del Principáu d’Asturies deben garantizar y promover tolos derechos de les persones, incluyendo l’accesu a la salú, la vivienda digna y la educación”, añaden dende la organización nacida nel 1961 n’Inglaterra pa defender los derechos humanos en tol mundu. Col contestu actual, AI considera fundamental la permanencia de la figura de la Procuradora Xeneral, institución creada pa la defensa “de los derechos y llibertaes reconocíos nel títulu I de la Constitución, asina como de los principios establecíos nel artículu 9 del Estatutu d’Autonomía”.
 
Por último, solicita al Gobiernu’l que l’ayuda al desarrollu “siga orientada a la proteición efeutiva de los derechos humanos” y que nun se recorten los programas destinaos a esi fin, como’l Programa Asturianu d’Atención a Víctimes de Violaciones de Derechos Humanos.
 
Presentación del Informe 2012
 
Amnistía Internacional fixo estes peticiones al Gobiernu del país mientres la presentación del Informe Anual 2012 de la organización. Ésti, que fai un balance de la situación del mundu nel 2011, señala que’l Conseyu de Seguridá de la ONX “paez cansáu, desfasáu y cada vegada menos afayadizu pa la so función”. Siria, el procesu eleutoral n’Exiptu o la non intervención en Sri Lanka, son dalgunos de los exemplos citaos por AI. Hai que destacar que l’Informe rellata casos concretos de restricción de la llibertá d’espresión en, al menos, 91 estaos, asina como casos de tortures o malos tratos en, al menos, 101, munches vegaes namái por participar en manifestaciones.
 
“La conferencia de la ONX que se va celebrar en xunetu p’alcordar un ‘Tratáu sobre Comerciu d’Armes’ va ser una prueba de fueu para ver si los políticos son capaces de poner los derechos humanos penriba los intereses y los beneficios propios. Ensin un tratáu sólidu, la función del Conseyu de Seguridá de la ONX como guardián de la paz y la seguridá mundiales paez abocada al fracasu, colos sos miembros permanentes exerciendu un vetu absolutu sobre cualquier resolución a pesar de ser los mayores proveedores d’armes del mundu”, sentencien dende AI.