Amistosu repartu de puntos ente R. Uviéu y Universidá

Real Uviéu y Universidá empataron a unos nun partíu entreteníu pal públicu pero al que-y faltó agresividá en tou momentu

L'Uviéu repitió equipu (solo Ricardo entró por Paul) y salió con ganes d'agradar a la xente que se xuntó nel Tartiere nuna fría y desapacible tarde, pero topóse con un Universidá que-y tapó dafechu les llinies de creación, aprovechando la velocidá d'un gran Omar que salía rapidísimu a la contra, provocando abondes situaciones de peligru pa la meta de Rafa Ponzo.

Con Michu y Benxamín afogaos pola presión del equipu universitariu, Jon Carrera yera'l xugador con más movilidá y asina tuvo munches clares ocasiones de gol que nun entraron polos palos o les bones paraes de Chema. El partíu yera un refileru d'ocasiones de gol pa los dos equipos, más pal Uviéu pero l'Uni tamién tuvo les de so, naide consiguía marcar hasta que llegó'l minutu 40 nel qu'Omar acertó a marcar ún de los goles más prestosos de va tiempu nel Tartiere. Foi'l gol soñáu por tou xugador que vuelve a la so casa intentando ganase un puestu pal equipu del añu que vien, llegó-y el balón dende la banda derecha y enganchó una chilena a gran altor qu'entro per tola escuadra de la portería azul. Omar pidió-y perdón a una grada qu'aplaudió bien de tiempu'l gran gol. Namás sacar de centru l'Uviéu tuvo a puntu d'empatar, otra vuelta Jon Carrera, pero'l balón dio nel poste cuando yá se cantaba'l gol nes graes.
Na segunda metá'l partíu siguió nes mesmes coordenaes, falta d'agresividá y munches ocasiones pa los dos equipos. Rivas cambió l'esquema del equipu p'acabar xugando con solo tres defenses y dos delanteros (Aldeondo y Cervero). Foi nel minutu 81 nel qu'otra vuelta Jon Carrera fizo una bona xugada na qu'entró nel área y en vez de tirar a puerta pasó-y el balón a Aldeonso qu'acertó a marcar el gol d'un empate que yá diba ser definitivu.


L'Uviéu acaba l'añu ensin perder partíu nel Tartiere pero van yá unos cuantos empates siguíos en casa, de toes formes, sigue manteniendo una cómoda situación na cabeza de la tabla y paez que solo'l Mosconia-y aguanta'l ritmu.