“Amigos de los bables” piden que pase a información pública’l “Plan de Normalización”

"Amigos de los bables" l'asociación que nos años 80 axuntaba a tola oposición académica y mediática a la normalización del idioma y qu'asoleyare a últimos d'aquella década'l famosu
famosu "manifiestu de sensatos y bienpensantes" contra la oficialidá del asturianu, vuelve a dar que falar. L'asociación qu'encabecen Josefina Martínez, Modesto González Cobas, Jesús Neira y Gustavo Bueno punxo nel rexistru de la Conseyería de Cultura un escritu en que demanden que se someta a trámite d'información público'l Plan de Normalización Social del Asturianu 2004-2007, apelando pa ello a artículos de la llei de procedimientu administrativu y del réxime xurídicu de les alministraciones públiques.


La solicitú de los "Amigos de los bables" asociación que s'atechó siempre tres del argumentu de la falta d'unidá llingüística del asturianu p'atacar toles llinies política normalizadora del idioma, garró de sorpresa a los actuales responsables de política llingüística del Gobiernu asturianu, que nun contaben con un movimientu d'estes característiques por parte del grupu qu'encabeza la profesora de la Universidá d'Uviéu y vilda del filólogu Emilio Alarcos. Sicasí, toles fontes consultaes por Asturies.com quíten-y seriedá a la solicitú de los "amigos de los bables". Asina, el director de la Oficina de Política Llingüística Ramón d'Andrés esplicó a Asturies.com que l'aprobación del plan yá nun tien torna posible en cuantes que per una parte les sos llinies polítiques yá tan aprebaes dende'l pasáu día 17 y per otra l'aprobación de la memoria económica y demás documentos que complementen a estes llinies polítiques ye inminente..

D'Andrés espresó que'l movimientu de "Amigos de los bables" daba-y pa una reflexón personal. En pallabres del Director de la oficina a Asturies.com "El fechu de que "Amigos de los Bables" vuelvan a tener presencia pública por esti asuntu dempués d'años ensin actividá conocida quier dicir que dalgo bueno tien de tener esti plan".