Amigos de la naturaleza protesten pola situación del faisán montés

Les asociaciones A.N.A. (Asociación Asturiana d'Amigos de la Naturaleza) y C.O.A. (Coordinadora Ornitolóxica d´Asturies) ficieron un llamáu públicu d'atención sobre la situación de conservación pela que pasa'l Faisán Montés (Tetrao urogallus cantabricus).

COA Y ANA asoleyen datos del últimu censu correspondiente a esti añu y aseguren que namás queden 150 machos d'esta especie, cuando nel añu 1982, cuando la especie yá taba nun declive mui acusáu había sobre 600. Esta mengua del 75 % en 23 años cébase col conceyu d'Ayer, onde yá namás queden que cuatro machos censaos nun conceyu nel que nel añu 1982 queaben cuarenta, ello al empar qu'espacios reconocíos llegalmente como'l Parque Natural de Somiedu yá nun agospien nengún exemplar d'esta especie acabante de declarar como en peligru d'estinción.

En xunetu del 2003 COA y ANA yá denunciaren que la población de faisán montés asturiana franciere en dos bloques aisllaos ente ellos. Dos años dempués, la dixebra de la población asturiana en trés grupos acompáñase tamién de la desapaición definitiva de os núcleos de población que quedaben en Galicia, Cantabria y Palencia.

El faisán montés ye un taxón únicu nel mundu que pertenez a una subespecie aparte, la "cantabricus" que s'estrema por ser ente otres coses el faisán más pequeñu del planeta col faisán pirenáicu y l'únicu que vive n'ecosistemes de fueya caducifolia. La mengua histórica dela superficie de viesca na cordal cantábrica, la caza indiscriminao, la gran cantidá d'infraestructures como carreteres y pistes, la mayor presencia d'otres especies que compiten col faisán pol alimentu, casu del venáu y el xabaril son les causes que llevaron al faisán a la situación actual, anque COA y ANA apunten tamién al abandonu por parte de l'alministración, lo que-yos lleva a opinar que la declaración como especie en peligru d'estinción, que yá se llevaba pidiendo dende los años 80, llega tarde.

Pa qu'esti retrasu nun se convierta en fatal, ANA y COA encamienten que se dea conteníu "inmediatu" a la declaración como especie en peligru d'estinción y facer que pase de ser una declaración d'intenciones a ser dalgo real. Pa ello proponen una riestra de midíes, ente elles ña prohibición del pastoréu en llugares abrasaos pol fueu, a oxetu de que los puea recuperar el faisán, prohibir los aprovechamientos primarios como ganadería, agricultura, caza, pesca o minería nos cantaderos que se conocen de faisán, el control y desanicie del venáu y el xabaril nestos llugares, xubir los índices de protección nos llugares onde la especie ta más amenazada o poner más control de guardería, ente otres.