América xube los tipos d’interés

L'aconceyamientu de la Reserva Federal de los Estaos Uníos (FED) nun dio munches sorpreses a la comunidá inversora. El presidente de la Reserva Federal, Alan Greenspan, fizo lo previsto y dio anuncia d'una medra d'un cuartu de puntu nos tipos d'interés, que pasen del 1,75% al 2%. La bona productividá norteamericana xunta la meyora del mercáu llaboral permiten xubir el preciu del dineru ensin correr riesgos según el presidente de la FED. Nos mercaos l'ablucante xuba del euru y la inestabilidá nos precios del petroleu acutaron los titulares de la prensa económica.

Ente les estadístiques de la selmana pasada nos Estaos Uníos tovieron les ventes al por menor d'ochobre, meyores de lo estimao con una xuba del 0,2%, los inventarios al por mayor de setiembre (+0,1%) perbaxo de lo esperao y el datu de confianza de la Universidá de Michigan de payares qu'algamó los 95,5 puntos, muncho meyor que los 93 puntos que se contaben. Na Zona Euru'l PIB del tercer trimestre comunitariu foi del 0,3%, una décima más de lo estimao. L'IPC d'ochobre francés tuvo un resultáu del 2,1% y el permalu PIB francés del tercer trimestre foi del 0,1%, dos décimes menos de lo esperao. El datu del IPC d'ochobre d'España xubió hasta'l 3,6% colo que la inflación medra asgaya nun marcu mui complicáu de baxu xorrecimientu económicu y altos precios enerxéticos.

Selmana de más a menos nos mercaos internacionales. Nes bolses de Nueva York el pieslle foi positivu, col Dow Jones nos 10.539,01 puntos (+0,66%) y el tecnolóxicu Nasdaq asitiáu nos 2.085,34 (+1,17%). Nel Vieyu Continente les bolses de Llondres y Francfort foron les que meyor resultáu algamaron con xubes alrodiu'l mediu puntu.

Una de les anuncies de la selmana na Bolsa de Madrid foi ensin dulda la perbona cotización de Jazztel. Dende que Fernández Pujals, fundador de Telepizza, mercare la empresa de telecomunicaciones, el valor tuvo una xuba del 262%. El casu ye que l'aición de Jazztel ta mui cerca del euru mientres qu'hai bien poco valía sobre 0,25 céntimos aición. Jazztel ta moviendo al día el 60% del so capital y ye ún de los valores más activos del parqué madrilanu. Ente los brokers rúxese que dalguna multinacional anda tres de Jazztel y que Fernández Pujals ya ta preparándola pa la venta.

Axuste a la baxa nel preciu del petroleu que ya entamó un nuevu periodu de moderación. Pero mentanto los mercaos siguen dando blincos col preciu del petroleu. De momentu la cotización del barril Brent asítiase penriba los 43 dólares. La fuelga de los sindicatos en Nixeria y la situación n'Iraq son les escuses de los especuladores pa caltener altu'l preciu del oru prieto.

Cayida técnica na Bolsa de Madrid dempués de díes de xuba. El vértigu inversor frenó al final de la selmana con una cayida selmanal del 0,24% del selectivu Ibex hasta los 8.550 puntos, ello dempués de trés selmanes siguies de xuba qu'asitiaron al Ibex-35 en máximos añales poniendo a la mayoría de los valores en terrén positivu. L'anuncia de la selmana foi la llegalización de la compra del Abbey National británicu pol SCH. El bancu inglés yá ye dafechu una filial del bancu de Botín y entama un nuevu camín dientro del mapa bancariu europeu. Los "chicharros" del parqué madrilanu son los más beneficiaos de les xubes: Service Point, Ercros, Avanzit, Sniace y Jazztel tuvieron importantes revalorizaciones. Otros valores con pieslle en positivo foron SCH, Telefónica, Repsol, Ferrovial y Arcelor. Nel terrén negativu'l BBVA, Zeltia, FCC y Banesto foron les más castigaes polos inversores.

L'euru asítiase cada vegada más lloñe del dólar. La selmana pasada la divisa europea algamó los 1,2968 dólares unidá. Tamién influye sobremanera la política de dólar feble que caltién l'Alministración Bush col oxetivu de menguar el déficit comercial USA. Nel mercáu de renta fixo los bonos tuvieron una selmana de volatilidá.