Alxudicaes les obres del túnel del Rañadoiru

La Conseyería de Mediu Ambiente, Ordenación del Territoriu y Infraestructures alxudicó les obres de construcción del túnel del Rañadoiru a la xuntura temporal d'empreses qu'igüen Ferrovial-Agroman, OCA, S. A., y Aglomerados Asfálticos. Con un presupuestu de 40.634.568,80 euros, esti tunel de 3.930 metros va tener un plazu d'execución de 36 meses, colo que se cuenta que'l túnel, pasu ente los conceyos de Cangas del Narcea y Degaña, tea rematáu pal añu 2010.

Asociaciones ecoloxistes de tol estáu protestaren nel so momentu contra la construcción d'esti tunel y contra la de l'autovia ente La Espina y Ponferrada (Lleón) na que s'inxertará nun futuru esti túnel. L'altu valor mediuambiental de la zona pela que va pasar el túnel causó tamién un retrasu grande na so construcción, al obligar la Unión Europea a facer bien de modificaciones sobre'l proyectu orixinal. D'esta miente, les obres nes entraes del túnel van aparase ente los meses de setiembre a abril pa nun molestar a la fauna del llugar. Les midíes compensatories obliguen tamién a llantar 40 hectárees de biesca autóctono y recuperar los cerca de cinco kilómetros de l'antigua carretera que van quedar fuera d'usu.