Álvarez Sostres ponse al frente d'una comisión asesora de Moriyón, "llexítima presidenta de Foro"

|
Inaciu Iglesias, Enrique Álvarez Sostres, Carmen Moriyón y María Jesús Alonso

L’ex diputáu nel Congresu y fundador de Foro, Enrique Álvarez Sostres, preside la nueva Comisión d’Estudiu Estratéxicu y Análisis Políticu del partíu, con función d’asesoramientu a la presidenta Carmen Moriyón. Nella participen l’empresariu Inaciu Iglesias y la tamién fundadora María Jesús Alonso, ente otros.

“Nun tendrá función executiva nenguna, y de fechu, nengún de los sos miembros pertenez a nengún órganu de direición o de funcionamientu de Foro, porque son dos ámbitos qu’han de permanecer bien diferenciaos”, apuntó Moriyón, pa depués especificar que “encomendé a esta Comisión de Comisión d’Estudiu Estratéxicu y Análisis Políticu la xera d’asesorame, de facer propuestes y llinies d’actuación, que depués serán estudiaes pola Comisión Direutiva, que ye l’órganu al que-y correspuende adoptales”. “Foro pasó por un procesu internu de cambiu de lideralgu democráticu, complexu y difícil, pero la sociedá asturiana esíxenos urxentemente que formemos parte de les soluciones, non de los problemes, y eso ye lo que vamos facer”, añadió.

Van acompañar a Álvarez Sostres, presidente de dicha comisión, Iglesias, Alonso, Argimiro Rodríguez, Francisco Rivas Álvarez y José Luis Mediavilla. “Foro céntrase dende güei –pol llunes– en formar parte de les soluciones qu’Asturies nos esixe, que nun pueden esperar y que siguen ensin llegar”, siguió l’ex diputáu, qu’apuntó que “la nuesa misión, ensin función executiva nenguna, ye asesorar a Carmen Moriyón, la llexítima presidenta de Foro Asturias, y contribuyir na xera de recuperar y reactivar un proyeuto políticu que nunca debió alloñase del so lema fundacional: con Asturies, por Asturies y p’Asturies y los sos ciudadanos”.

L’auditoría, nes selmanes próximes

Con Franscisco Álvarez-Cascos fuera de los órganos de direición, el lideralgu de Moriyón al frente de Foro paez afitáu, contando col sofitu de los trés alcaldes de la formación y de la mayoría del mediu centenar de conceyales, al que se suma agora públicamente la d’Álvarez Sostres. Otra manera, nes selmanes próximes finará l’auditoría encargada de les cuentes del partíu dende la so fundación.

Na semeya, Iglesias, Álvarez Sostres, Moriyón y Alonso.

Contador Estadistiques