Álvarez Areces promete atención especial pa los pueblos con menos habitantes

El candidatu socialista a la Presidencia d'Asturies, Vicente Álvarez Areces, anunció ayeri nel trescursu d'una visita al conceyu de Degaña, onde comprometió la creación d'un muséu etnográficu, la so propuesta de crear una sociedá de calter públicu pa rehabilitar núcleos rurales que tean deshabitaos y que tengan interes especial dende'l puntu de vista patrimonial y arquitectónicu, atendiendo en primer llugar a los que s'asitien dientro de los cinco Parques Naturales asturianos.

Pa estos espacios naturales protexíos, el presidente del Principáu propunxo tamién la creación d'un "Billete Verde" que permita recorrer tola rede d'espacios naturales del país "a precios asequibles". Ente los sos compromisos cola Asturies más rural, Areces sorrayó'l de meyorar les comunicaciones y a que tolos núcleos de más de 250 habitantes cuenten con saneamientu, un compromisu que s'espurre a tolos que tengan más de 50 habitantes y que tean dientro d'Espacios Naturales Protexíos.