Alsa entra en Chile

La multinacional asturiana del tresporte ta pa convertise nun operador global de tresportes con negociu cada añu en más países. L'añu pasáu, Alsa fízose col 51% de la ompañía Lit, entamando un desembarcu en Chile nel qu'esti país sedría la base pa depués espardese per toa América del Sur. La entrada d'Alsa en Chile ta alcontrando la resistencia de los pequeños empresarios locales del sector, que tienen mieu de qu'Alsa-yos quite'l negociu de les manes atechada na so superioridá financiera y tecnolóxica, y favorecida poles normes qu'afalen a remocicar flota d'autobuses y a que'l serviciu lu dean operadores más capaces nun momentu nel que'l tresporte urbanu en Santiago ye un barullu que vien de cuando la dictadura de Pinochet. D'aquella desregulóse dafechu'l sector, faciendo-yos un favor a los empresarios del tresporte que, cola fuelga del 73, ayudaren a baltiar el gobiernu d'Allende esfaltando'l camín pa la dictadura. El tresporte foi entós y ye agora una de les estayes más influyentes en Chile, como pue vese al tenor de los movimientos qu'hai alredor del procesu de nueves licitaciones y reordenamientu del mapa del tresporte, qu'esti veranu llevó a una fuelga de tresporte que paró la ciudá de Santiago de Chile y acabó cola detención de los empresarios que la ficieron.Agora mesmo, Alsa opta a tres llinies del nomáu "metrobus" de Santiago, un concursu entovía ensin alxudicar pero nel que la pesencia d'Alsa parez que nun sienta demasiao bien. La fuelga de tresporte que paró esti mes d'Agostu la ciudá de Santiago de Chile y acabó con detenciones tuvo ente otros motivos la entrada nel negociu d'Alsa y Lit, que se pescancia como una amenaza na guerra ente empreses particulares pola xestión del serviciu públicu.