Alonso, terceru tres d'una salida espectacular

Ferrari ganó ayeri nel Gran Premiu d'Hungría'l so decimocuartu títulu de constructores de Fórmula 1 gracies al doblete de los sos dos pilotos, Michael Schumacher y Rubens Barrichello, amarrando más l'alemán el trunfu nel mundial de pilotos, pero tres de los insuperables coches encarnaos namás tuvo Fernando Alonso, que xubió al caxón na carrera en que ganare l'añu pasáu.

Fernando Alonso salía na quinta plaza, una posición un migayín retrasada pa postular a puestos nel caxón nuna pista estrencha como la de Hungaroring, pero n'otra salida espectacular, el pilotu asturianu pasó namás prendese la luz verde a los dos BAR-Honda de Button y Sato, y nun tris tuvo d'adelantar tamién al segundu Ferrari de Barrichello

La carrera acabó ehí, porque lo de dempués namás foi una procesión na que cada pilotu aguantó la plaza, anque con Schumacher rodando a segundu por vuelta más rápido que los demás -llegó a doblar al sestu clasificáu-. Tres de los puestos de caxón, el colombianu Montoya, ún de los pocos que foron quien a pasar a otros pilotos na pista húngara, acabó cuartu col Williams BMW, que parez que va recuperando algo de competitividá. Quintu foi el BAR-Honda de Jenson Button.

Col tercer puestu, Fernando Alonso sigue na quinta plaza del mundial con 45 puntos, pero a un puntu namás de Jarno Trulli, que ye agora cuartu con 46. Más difícil d'alcanzar ye Jenson Button, que ta terceru con 65.