Alonso, terceru n'Alemaña

Fernando Alonso foi ún de los pilotos más revolvinos nun Gran Premiu d'Alemaña de Fórmula 1 emocionante, espectacular y abiertu pa tolos coches, sacantes el Ferrari de Michael Schumacher, que demostró que ta un escalón penriba de los demás y ganó otra carrera que lu allega más a algamar matemáticamente'l campeonatu.

Tres de la bala encarnada salió Fernando Alonso.

Quintu nos entrenos, l'asturianu adelantó trés puestos en dándose la luz verde avanzando hasta una segunda plaza que-y diba durar poco, en cuantes que'l finlandés de McLaren kimi Raikonnen, aprovechando la potencia del motor Mercedes, adelantó ensin contemplaciones al Renault d'Alonso. Sicasí, el nórdicu perdía poco dempués una aleta del coche, y, faltu d'aposientu aerodinámicu, cedía la plaza. Alonso poniase segundu, pero trés d'elli venía Jenson Button, el meyor ayeri en Hockenheim y l'únicu capaz d'allegase na tabla a Schumacher. L'asturianu y l'inglés ficieron un duelu impresionante y prestosu de ver nel que la meyor frenada y agarre del Renault competíen contra la potencia del Honda.

La competición ente los dos acabó cuando una pieza qu'andaba pela pista montó nel alerón d'Alonso. Faltu d'aerodinámica, el coche francés perdía velocidá y tenía de ceder énte l'inglés. El podiu peligraba, y Alonso, col alerón inútil, perdía 4 segundos en cada vuelta, allegándose-y peligrósamente'l Mclaren de Coulthard y el Williams de Montoya, pero por suerte, el coche dio un ximielgón al pisar un bordillu, echando fuera'l tapón y recuperándose dafechu l'aerodinámica pal final de la carrera, lo que-y permitió al pilotu asturianu rematar la preba en puestu de podium. Alonso ye agora quintu nel mundial a siete puntos de Jarno Trulli y enencha la ventaya que tien sobre'l quintu, Pablo Montoya.