Alonso, segundu en Cataluña

Nuna carrera en que Kimi Raikonen mandó dende l'entamu al final, Fernando Alonso fizo un segundu puestu que-y val pa enanchar el furacu que tien na clasificación xeneral del campeonatu colos demás pilotos.

El pilotu asturianu nun pudo siguir la so racha de trunfos nel Gran Premiu d'España, onde'l Renault nun tuvo a l'altura del McLaren Mercedes de Kimi Raikonen y onde amás el desgaste d'una cubierta poles altes temperatures, que sacaron angüeñes na goma del coche del asturianu, obligó a Alonso a aselar y rodar hasta dos segundos por vuelta más despacio que'l pilotu nórdicu. Con too y con ello, Alonso firmó una carrera mui profesional, saliendo terceru y acabando en segunda posición.

Pa ello, Alonso pasó na salida al Williams BMW de Mark Webber, que salía'l segundu. Alonso tiró pa dir pol coche del Finlandés, pero Kimi taba un escalón penriba de los demás coches, y, anque la diferencia que sacare de mano'l McLaren - Mercedes quedó en nada al neutralizase la carrera un intre polos problemes de los dos Minardi, Raikonen volvió a despegase d'Alonso, qu'amás entamó a sufrir el problema de les angüeñes de goma na superficie de les sos cubiertes. Tres d'elli, a muncha distancia, entraron pegaos los dos Toyota de Trulli y Ralf Schumacher, mientres que la quinta plaza foi pal compañeru d'Alonso, Fisichella, que remontó dende lo cabero del pelotón tres de sufrir una avería qu'obligo a sustituyir el focicu del coche. Peor foi pa Michael Schumacher, y ye que'l Kaiser abandonó dempués de pinchar dos cubiertes nel so coche.

Sicasí, la noticia de Montmeló foi la marea azul que siguió a Alonso, con más de 10.000 aficionaos tomando'l circuitu con banderes asturianes que se vieron per tolos requexos de la pista y prácticamente en cada planu de la tresmisión de TV, que contemplaron solo n'España más de 6 millones de persones. No deportivo, Alonso ye líder destacáu del mundial con 44 puntos, mientres que Michael Schumacher queda yá cásique descartáu pa la llucha pol trunfu, a la que si que s'apunta Kimi Raikonen, anque va tener que recuperar munchu terrén perdíu.