Alonso, quintu cola dirección trabada

Michael Schumacher mandó nel Gran Premiu d'Europa, onde disfrutó d'una ventaya tan grande que nun perdió la primer plaza más qu'un intre, el qu'aprovechó precisamente Fernando Alonso pa mandar el pelotón por primer ocasión esti añu, anque ello namás duró una vuelta, porque l'asturianu tuvo qu'entrar tamién a echar gasolina y salió metíu nun pelotón de tráficu pesáu nel que perdió munchu tiempu.

Eso, y un problema de dirección torgaron ver una gran actuación del corredor asturianu, que sorprendió a tol mundu metiéndose terceru na primer vuelta. Saliendo sestu na parrilla, Alonso fuxó del baruyu de la primer curva y alcanzó la tercer plaza tres de Kimi Raikonen, pero'l McLaren Mercedes frenó l'avanzada del Renault d'Alonso, que d'otra manera bien pudiere facer furacu nes primeres vueltes. Tres de la primer parada en box entamaron los problemes técnicos p'Alonso, que notaba que la dirección del Renault fallaba cada vegada más hasta que llegó'l momentu en que'l volante trabó, echando al asturianu fuera de la pista. Alonso pensó entós n'abandonar la carrera, pero foi a devolver el coche al esfaltu, rodando lo más aposentao que pudo pa ser a marcar los puntinos de la quinta plaza

D'otra manera, tres de los Ferrari -Barrichello foi tol tiempu al rau de Schumacher p'afitar el doblete- la emoción punxéronla tamién los Bar Honda. Takuma Sato fizo una carrera de mayestru, pero franció'l focicu del coche dempués d'adelantar a Barrichello. Anque' nipón tornó a la pista en puestos más retrasaos, l'arreventon del motor Honda torgó les posibilidaes del gran animador de la carrera. Menos revolvín tuvo Jenson Button, que col otru BAR Honda amarró la tercer plaza y ye agora mesmo, l'únicu pilotu que pue amenazar a Schumacher na llucha pol títulu (Barrichelo tienlo prohibío por contratu). Renault asitió a los sos pilotos cuartu y quintu y sigue sumando puntos pal mundial de constructores, mientres que Fisichella (Sauber-Ferrari) llegó a la sesta plaza a fuerza de trabayu y Mark Webber fizo una carrera mui d'emponderar col Jaguar. Los Williams anden saltando yá del sartén al ascua, y Montoya namás pudo facer octavu, anque peor ye lo de McLaren. Cuando paecía que Raikkonen podía salvar la imaxe del equipu, los dos coches grises terminaron otra vuelta fuera de la carrera colos motores arreventaos.