Alonso espera aconceyar definitivamente cola ministra Isabel Celaá la selmana qu’entra

|
Alonso espera aconceyar definitivamente cola ministra Isabel Celaá la selmana qu’entra

Genaro Alonso acudió esti miércoles a la Conferencia d’Educación celebrada en Madrid, onde se trató l’anteproyeutu de llei de modificación de la LOE pa la derogación de la LOMCE y la competencia de la regulación del enseñu de les llingües del Estáu. El conseyeru anunció una entrevista cola ministra Isabel Celaá la selmana qu’entra na que se falará sobre la especialidá docente.

Asturies acudió a esti alcuentru ente la ministra y tolos conseyeros d’Educación con dos esixencies sobre la mesa, la primera “una meyor financiación y un apoyu económicu”  porque “non toles comunidaes autónomes tienen la mesma situación demográfica”, que nel casu asturianu ye de “declive demográficu, con una dispersión grande, y cola escuela rural con un pesu grande”. La segunda, referente a la etapa de 0 a 3 años, que va na mesma direición, yá que considera necesario “que’l Gobiernu d’España se comprometa d’una vez por esta etapa educativa-asistencial con un crecimientu imparable”.

Son los dos temes que, según apuntó, va tratar en dicha entrevista solicitada cola ministra, “que se comprometió a incluyilos nel anteproyeutu de llei” de modificación de la Llei Orgánica d’Educación (LOE) que tien como oxetivu derogar la LOMCE, vixente anguaño. Ésta va celebrase “quiciabes la selmana próxima si les axendes nos coinciden pa veme con ella”, y nella trataráse, anque nun lo citó ayeri en Madrid, la creación de la especialidá docente de Llingua Asturiana y Gallego-asturiano.

El desbloquéu d’esta cuestión foi una de les prioridaes destacaes por Alonso en setiembre na Xunta Xeneral –les otres dos yeren la escuela rural y el 0 a 3– a la espera d’esta reunión cola ministra prevista nun primer momentu pa esi mesmu mes, que nun acabó de llegar. El cambiu de Gobiernu, cola llegada del PSOE tres la moción de censura al popular Mariano Rajoy, considerábase qu’aceleraría un procesu que sigue paralizáu cuatro meses depués de la primer anuncia del conseyeru.

Llingües cooficiales

Na Conferencia d’Educación tamién se faló sobre la situación de les llingües del Estáu nel anteproyeutu. “Tolos conseyeros de comunidaes autónomes con llingua propia cooficial esixeron a la ministra que compete a la comunidá autónoma regular la so enseñanza y el so usu vehicular nel sistema educativu”, esplicó Alonso, qu’añadió que ye un aspeutu que cree “que nun va constituyir problema nengun porque entendemos que les llingües son instrumentu de comunicación, non de confrontación”.

Por último, apuntó que “l’asturianu, qu’anque nun sía cooficial sí tien proteición llegal, nun debiera ser un elementu de confrontación, sinón de diálogu y entendimientu, y fai falta falar muncho”.

Na imaxe, Celaá toma la pallabra na Conferencia d'Educación con Alonso enfrente a la so izquierda xunto col restu de conseyeros. Semeya propiedá del Ministeriu d'Educación y Formación Profesional.

Contador Estadistiques