Alonso acaba terceru nuna carrera alloriante

El pilotu asturianu de Fórmula 1 Fernando Alonso acabó en tercer posición nel Gran Premiu del Brasil, tercer carrera del añu y 700 na historia de la Fórmula 1 dende que s'implantare la categoría en 1.950 y, ensin dulda, una de les más alloriantes na historia del automovilismu. L'agua que cayó del cielu tol fin de selmana y los charcos del estadiu brasileñu garraron col pie cambiáu a Michelin y Bridgestone. Les dos cases que furnen de cubiertes a los coches de la F1 namás llevaron cubiertes mistes de seco-agua, y non les d'agua dafechu que precisaba la pista brasileña. Ello llevó a que la carrera entera fore una riestra de sapiazos y cacharrazos que dexaron fuera de competición a la metada de los pilotos y qu'obligaron a que'l coche del xuez parare la carrera delles vegaes, interfiriendo decisivamente nel resultáu de la mesma.

Saliendo na décima posición de la parrilla, Alonso contaba con xubir dalgún puestucu y entrar a los puntos, pero naide podía acertar la quiniela brasileña. Yá namás entamar, salió'l coche del xuez y los corredores tuvieron que facer salida llanzada tres de nueve vueltes de neutralización. L'asturianu aguantó'l coche derechu como una vela en medio de la catástrofe, aprovechando los accidentes e los demás pa dir ganando places, y llegó a colocase séptimu cuando cayó hasta la última plaza por culpa d'un fallu na estratexa de boxes del equipu, que-y mandó entrar dos veces seguíes a echar gasolina. Dende la plaza catorce, Alonso entamó otra remontada en que nun fizo otro qu'adelantar coches y superar accidentes, pero'l de Reanault nun pudo evitar que lu pasare a elli el coche del añu, el McLaren Mercedes de Raikonen.

Con too y con ello, Alonso dexó otra imaxe pal recopilatoriu del añu cuando pasó al Williams de Ralf Schumacher nuna maniebra que duró dos curves. Con dos parades más en boxes que tolos demás coches y con una parada de castigu por adelantar con bandera amariella de peligru, Alonso diba, contra tou pronósticu, terceru na vuelta 53, pero nesi momentu pasó lo que nun tenía que pasar. El Jaguar de Ralph Firman estrellábase y los cachos del bólidu quedaben esparcíos per tola pista. Fisichella y Raikonen pudieron esquivalos, pero, en medio d'una cortina d'agua y ensin señales de peligru qu'alvirtieren d'ello, Alonso nun podía evitar el llevar per delantre una rueda del coche verde, estrozando'l Renault a más de 230 km/h. Los xueces decidieron entós parar la carrera y dar por buena la clasificación de la vuelta 51, con Raikkonen primeru, Fisichella segundu y Alonso terceru.

Si la carrera foi rara, el podiu foi más, porque foi la primer vez na historia qu'un pilotu nun pudo subir a pol premiu. A resultes de l'accidente los médicos mandaron llevar a Alonso al hospital, onde nun-y alcontraron lesión nenguna más que los golpes y l'azote que supón pal cuerpu la deceleración del accidente. Terceru na carrera y na clasificación del campeonatu, Alonso va llegar al Gran Premiu d'España como la revelación confirmada del añu.