Allegría, música y compromisu nel homenaxe a Yolanda Huergo

Nin el sol quixo perder el domingu l’actu d’homenaxe a Yolanda González Huergo qu’entamó la Xunta pola Defensa de la Llingua Asturiana (XDLA), del que presentamos una galería de semeyes. El bon tiempu acompañó y muncha xente acudió al Muséu del Pueblu d’Asturies pa participar nun eventu nel que nun faltó l’allegría, la música y el compromisu, aspeutos que definíen a Yoli.

A la hora prevista pal entamu, les 12.30 hores, yá se vivía un bon ambiente al rodiu del tendayu, que foi aumentando según avanzaba la mañana. Naciu Varillas foi’l primeru en tomar la pallabra, dando pasu darréu a Felpeyu, banda qu’abría les actuaciones musicales.

El compromisu de González Huergo con causes como la reivindicación llingüística, la defensa de los derechos humanos o la militancia política dende l’asturianismu quedó reflexáu nes diferentes intervenciones de compañeros que xubieron al escenariu. Eugenia Suárez Serrano, ex vicerrectora de la Universidá d’Uviéu y compañera n’Amnistía Internacional; María Xosé Martínez, presidenta de la XDLA; y José Luis Carmona coincidieron en rescamplar la importancia de la buelga dexada pola xixonesa y l’exemplu que supunxo pa tolos que la conocieron.

Iris Díaz Trancho, xunto Rubén Ardura, compañeru de vida de Yoli, y collacios, anunció amás la creación de l’Asociación Grana na so memoria y l’entamu del Premiu Yolanda Huergo pa trabayos d’investigación científica sobre Asturies. Darréu, L-R, nun conciertu nel que nun faltó la emoción, hasta’l puntu de que Leticia Baselgas tuvo que parar per unos segundos, recibiendo’l ciñu del públicu, punxo’l ramu a una xornada pa mirar al futuru, con una fecha marcada: el 16 d’ochobre, día nel que la XDLA convoca n’Uviéu una manifestación pola oficialidá del asturianu y del gallego-asturianu, nel marcu de les negociaciones pa la reforma del Estatutu d’Autonomía, que s’espera histórica.

Na semeya, un momentu de l'actuación de L-R, con un cartelu del homenaxe cola imaxe de González Huergo en primer plano.