Alienda y Guieldu van tocar el 10 de xunetu nel Festival de Ortigueira

Les dos bandes asturianes resultaron escoyíes como finalistes del concursu Runas de valores nuevos xunto colos aragoneses Muro Kvartet.

El Festival Internacional do Mundo Celta de Ortigueira, que se celebra nesta población gallega del 9 al 16 de xunetu, incorpora a Alienda y Guieldu a la so programación, na que tamién van tar presentes Algaire (martes 11 ) y Felpeyu xueves 13) nel escenariu principal. Ye gracies al Runas, llueu de convencer al xuráu profesional, compuestu pol conceyal del Festival do Concello de Ortigueira, Ángel Lozano; el coordinador del certame, Alberto Balboa; Xiana Lastra, integrante d'A Banda da Loba; y Miguel Doval, director d'Airiños de Fene.

De la votación popular Guieildu, segundu con más apoyos de los diez finalistes con un 20 por cientu del total, partía con 9 puntos, mentes qu'Alienda quedó quintu, con un 10 por cientu, recibiendo 6. Caún de los espertos puntuaron a les bandes de 10 a 1, asitiándose al final les dos asturianes entes los 3 con más valoración.

D'esta forma van tar sobre l'escenariu del festival el llunes 10 de xunetu xunto con Muro Kvartet, onde van actuar per 40 minutos nel escenariu principal contrataos con un caché de 1.500 euros. El ganador del Runas va repetir na edición del añu qu'entra con un conciertu dientro del programa oficial y un contratu de 3.000 euros.