Alicia González y Pelayo Sánchez, representación asturiana nos Mundiales de ciclismu d'Innsbruck

El de Teyego participa esti xueves na categoría junior, y la de Viella'l sábadu na elite.

El Tirol ta acoyendo dende'l sábadu pasáu los Mundiales de Ciclismu en Carretera, qu'estos díes vive les pruebes más importantes. Asina, ayeri celebróse la prueba elite contra'l cronu, que llevo l'australianu Rohan Dennis nun actuación espectacular, yá que superó en 1 minutu y 21 segundos al holandés Tom Dumoulin y al belga Victor Campenaerts, plata y bronce, de manera respeutiva.

N'Innsnbruck va haber presencia asturiana, debutando esta tarde Pelayo Sánchez na prueba junior. Paco Cerezo convocó al ciclista del Samuel Sánchez-MMR Cycling Academy pa formar parte d'un equipu lideráu pol andaluz Carlos Rodríguez, bronce nel Européu de la República Checa, qu'ha d'afrontar 132,4 duros quilómetros con gran desnivel nos que l'asturianu tien la orde de buscar una fuga.

La prueba va comenzar a les 14.40 hores y va poder siguise en direuto per Eurosport. La hora prevista de llegada de los ciclistes ye les 18.15 hores.

Tercera participación

Alicia González va competir per tercer añu siguío nos Mundiales na categoría élite depués de les esperiencies de Doḥa y Bergen. La carrera, que tamién va emitise en direuto per televisión, va tener llugar el sábadu a les 12.10 hores sobre un percorríu de 156,2 quilómetros nos que la ciclista del Movistar va tratar de tar nes posiciones primeres. Les 16.45 ye la hora estimada de llegada.