Alerta poles bateríes de cok d'Aceralia

El Colectivu Ecoloxista d'Avilés diz saber qu'esiste la intención por parte de la empresa Aceralia de prender les bateríes de cok que tenía apagaes nes sos instalaciones d'Avilés. Pal grupu conservacionista, ello nun pue facese mientres se caltengan enceses les bateríes que funciones anguaño ensin face-yos meyora técnica nenguna. Los ecoloxistes remembren que nel 96 el Conceyu dio-y el preste al prendíu de la batería 8, que llevaba parada 9 años, ensin tener en cuenta nengún de los argumentos que s'espusieron en contra d'ello, y alerten de la esistencia d'argumentos abondos pa que tampoco nun se faiga agora.

L'argumentación del grupu ecoloxista pa pidir que nun se prendan les bateríes de cok tiense en que los grupos avilesinos de carbón pa siderurxa presenten graves problemes de contaminación. Estos grupos, tan vieyos como la mesma fábrica d'Ensidesa-Avilés (1954) presenten yá de vieyo problemes de suelta de fumu y gases pel techu y per bien de compuertes que nun queden bien trancaes. Amás del problema de contaminación qu'ello supón pa la ciudá, el grupu ecoloxista diz que nun ha escaecese la calidá llaboral de los que trabayen ellí, y asina ye qu'un informe d'hixene industrial de febreru del 95 yá calificaba les bateríes de cok como "puestos de riesgu eleváu" por ser ambientes de "atmósfera agresiva".

La denuncia va más allá de pidir que nun se prendan les bateríes que tan apagaes, y ye que según los ecoloxistes avilesinos toles bateríes de cok funcionen ensin llicencia d'apertura nin d'obra para, siendo preciso que pa l'apertura de les dos que tan paraes se faigan los mesmos trámites que pa cualquier actividá industrial cuando tranca y vuelve abrir y que vien espeyáu nel "Reglamentu d'Actividaes Molestes Insalubres y Nocives" (RAMINP), abriéndose amás un tiempu d'esposición pública nel que poder facer alegaciones. Nesti sentíu, cada batería de cok tendría de considerase como una unidá productiva independiente en cuantes que caúna ocupa un edificiu separáu de les otres y qu'amás cada batería tien una fecha de construcción distinta, siendo la más vieya de 1955 y la más nueva del 69.

Los ecoloxistes denuncien qu'esisten amás "presiones indirectes" de la empresa pa que se caltengan en funcionamientu les bateríes de cok, amenazando cola posible desinversión d'Aceralia n'Asturies. Nesti sentíu, el grupu avilesín diz que los puestos de trabayu de les bateríes son pocos, precarios y amás subcontrataos "pa qu'Aceralía faiga caxa con un productu, el carbón de cok, que naide quier cerca de casa pol eleváu impactu que tien tanto en producción como n'almacenamientu y carga" ello cuando Asturies ye una de les poques rexones de la UE qu'entovía tienen una alta concentración de coqueríes.

Pal grupu que fai la denuncia, la presencia de les bateríes de cok supón tamién una torga pal futuru del polígonu industrial d'Avilés. Nesti sentíu, los ecoloxistes dicen que reciben quexes de los empresarios que yá tan asitiaos na redolada de les bateríes y atalanten que ye difícil que nenguna empresa que precise d'un ambiente llimpiu quiera instalase naquel llugar.