Aleguen contra una fábrica de sulfatos en San Xuan de Nieva

La Coordinadora Ecoloxista d'Avilés dio anuncia ayeri de la presentación d'alegaciones énte'l proyectu d'instalación d'una planta de producción de fertilizantes en San Xuan de Nieva.

La fábrica, iniciativa de la empresa Asturiana de Fertilizantes, emplegaría ácidu sulfúrico de la fábrica d'Asturiana de Zinc pa facer sulfatu magnésico y superfosfatos, ente otros productos, y yá recibió alegaciones d'otros colectivos y partíos políticos.

Nel documentu d'alegaciones, los ecoloxistes avilesinos soliciten que se concrete l'impactu na rodiada de los efectos del tresporte y descarga de los minerales que precisa la planta pa funcionar, esfaltando tola redolada de la fábrica pa que, en casu de fuga d'ácidu, esti nun caltrie en suelu.

D'otra manera, l'escritu d'alegaciones demanda que s'especifique meyor como va funcionar el procesu de tratamientu del agua na fábrica y tamién que va pasar col agua de lluvia na rodiada de les naves de la fábrica, en cuantes que nun se diz que tratamientu va facese con ello enantes d'echalo al Ríu Raíces.

En cuantes al funcionamientu de la planta, los ecoloxistes piden qu'esta emplegue caldera de gas contra la de fuel-oil que quier ponese por ser menos contaminante.

No que cinca a los residuos, los ecoloxistes llamen l'atención sobre la presencia como resultáu del procesu de la fábrica de fluosilicatu, que ta ensin esclariar como va tratase.

Otros residuos, los que salen pela chimenea, tamién son oxetu de l'alegación, que diz que nun se sabe que filtros van ponese pa frenar la emisión de partícules sólides y fluor, ello aparte del arrecendor a roca sulfatada que va soltar la fábrica entera.

Los ecoloxistes cuenten con que'l Principáu nun dea de pasu la fábrica hasta que nun s'igüen toos estos puntos, y manifiesten la so preocupación porque vaya asitiase esta fábrica nun llugar que yá soporta una gran presión industrial