Alcuerdu de collaboración ente Izquierda Asturiana y Asturianistes por Nava

Izquierda Asturiana (IAS) y l'agrupación Asturianistes por Nava, que cuenta con dos conceyales y que llegó a ostentar l'alcaldía del conceyu navetu, firmaron un alcuerdu de collaboración política col que declaren que pretenden estrenchar rellaciones y compartir información y trabayu conxuntu en temes qu'afecten a los conceyos de Nava y Piloña, onde IAS lleva trabayando dende va años y onde cuenta con obtener representación nes elecciones del 2007.

L'alcuerdu que roblaron dambes organizaciones dexa la puerta abierta al estudiu de pautos más amplios y d'espardelu a otros conceyos", en cuantes qu'IAS y APN comparten la visión de que'l trabayu en política municipal dende opciones asturianistes independientes o venceyaes a partíos políticos ha ser l'encontu pa construyir un proyectu nacionalista sólidu n'Asturies" un proyectu que se define como una "alternativa necesaria y progresista qu'Asturies precisa y que nun cubrió hasta agora nenguna de les opciones presentes nel mapa políticu asturianu". Nel alcuerdu, IAS y APN comprométense a sofitar iniciatives asemeyaes n'otros conceyos pa lo que dan anuncia de que van entamar un procesu de contactos.

Al actu de la firma acudieron los dos conceyales d'Asturianistes por Nava, Patricia Teja y Eduardo Torga, y los representantes d'IAS Faustino Zapico, de la Dirección Nacional del partíu y el so portavoz en Piloña José Ángel García "Allende".