Alcuentros Tradicionales de Trebolgu

Una iniciativa qu'entama'l grupu
folclóricu Trebolgu, y que llega a la so tercera edición con
un gran cartel d'actividaes que durarán tol 15 de xunu. La
organización vuelve apostar por nun facer namás qu'una nueche
folk, si non ufiertar más actividaes pa tolos gustos y durante toa una
xornada.

Les actividaes entamen a les 10:00 de la mañana nel parque del
oeste d'Uviéu, xunto al nuevu campu futbol, con una alborada na que van
participar delles bandes de gaites, y a les 12:00 la tradicional sesión
vermú na qu'habrá puestos tradicionales, y animará
l'ambiente'l grupu de baille Trebolgu y les bandes de gaites Xiranda y
Ciudá d'Uviéu, pa nun perder fuerces habrá un repartu del
bollu, y nun podía faltar una muestra de tonada.

Pa la tarde vamos tener xuegos pa neños a partir de les 16:00, a
les 17:00 entamará'l festival folclóricu Trebolgu, más
tarde una muestra de deportes rurales, y enantes de la nueche folk pieslla les
actividaes Milio colos sos cuentos a les 21:30.

A les 22:00 llega la nueche folk que va emprecipiar col grupu gallegu
"Irtio",
banda que naz l'añu 98 y con gran proyeción nel so país,
depués lleguen los Ciquitrinos que tan y van tar mui activos esti branu
gracies a la bona acoyida que-yos esta dando'l públicu. Depués
sube al escenariu una banda mui esperada polos aficionaos al folk
bretón, y que tuvo gran influencia nos grupos asturianos de folk como
Llan de Cubel, la mítica banda Kornog,
qu'amás d'actuar nesta nueche, tamién van facelo nel salón
d'actos del Antiguu Institutu de Xixón el día 17, y nel chigre Ca
Beleño'l día 18, vos daremos más información sobre
les hores d'estos conciertos nos próximos díes. Y pa finar con
fuercia esa nueche que meyor que Dixebra, con nuevos cantares del que va ser el
so nuevu trabayu "Sube la marea".