Alcuentren nel nordeste d'India una llingua hasta agora desconocida

Un equipu de llingüistes identificó una llingua hasta agora desconocida llamada "koro" nuna población del estáu d'Arunachal Pradesh, nel nordeste d'India.

De primeres confundióse con un dialectu de la llingua aka por cuenta de les característiques culturales que comparten los sos falantes, pero a lo último identificóse mientres una espedición que se realizó nel 2008 nel marcu del proyectu de National Geographic Voces Perdurables.
  
Los llingüistes que ficieron el descubrimientu --David Harrison, de la Universidá de Swarthmore, en Pensilvania (Estados Uníos) y Gregory Anderson, del Institutu de Llingües Vives pa les Llingües en Peligru, n'Oregon (Estados Uníos)-- alvirtieron que'l koro, que tien namás ente 800 y 1.200 falantes, podría estinguise próximamente. Esplicaron que los mozos tán dexando d'utilizar esta llingua a favor d'otres más dominantes y más estendíes, como l'inglés o l'hindi.
  
El koro pertenez a la familia tibetano-birmana, integraes por unes 400 llingües, de les que más de 100 fálense n'India. Los investigadores dixeron qu'esti idioma nun ta incluyíu nel censu indiu nin en nengún estudiu llingüísticu realizáu nel país asiáticu, probablemente porque se fala nuna zona aislada onde amás nun se realizaron munchos estudios nesti campu.
  
Peligru de desapaecer
La metá de les llingües vives conocíes qu'hai nel mundu tán en peligru de desapaecer y prevése que lo faigan a lo llargo d'esti sieglu. Los investigadores sorrayaron qu'esos idiomes precisen apoyu tecnolóxicu pa poder sobrevivir y pa caltener la base de los conocimientos sobre aspectos tan variaos como la medicina o la cocina que se tresmitieron neses llingües.
  
"Tamos travesando una crisis de llingües", afirmó Harrison, qu'añadió que si esti enclín sigue, "vamos perder la nuesa diversidá mientres el próximu sieglu". "El caltenimientu de les llingües contribúi a la historia de la Humanidá", aseguró.