Alarma ecoloxista énte la propuesta pa otra térmica en La Perea

La Federación Minerometalúrxica de CCOO propúnxo-y a la empresa HUNOSA llevar alantre una ampliación de la central térmica de La Perea (Mieres) cola construcción d'un grupu nuevu en casu de vese preciso pol aumentu de la demanda y si lo encamentaren les necesidaes del consumu, afondando na idega que yá se plantegare nel sen d'HUNOSA con motivu de la so entrada nun consorciu d'investigación coles empreses eléctriques Fenosa y Endesa.

La térmica de La Perea, con 50 MW de potencia construyérese a primeros de la década de los 90 pa quemar nella los restos de carbón que queden nes escombreres espardíes per Asturies. El secretariu xeneral del sindicatu CCOO n'Hunosa, Chema Antuña defendió la idega en cuantes qu'existe una xuba añal del consumu de corriente d'ente'l 4 y el 6 por cientu y en vista d'ello "ye preciso xenerar más corriente p'abaratalo de cara a la industria que tea asitiada n'Asturies y atraer empreses nueves".

La idega del representante del sindicatu mineru na empresa estatal minera nun-y cayó embaxo al movimientu ecoloxista. Paco Ramos, d'Ecoloxistes n'Acción, retrucó a les declaraciones del sindicalista con un escritu en que diz que, con tol respetu al sector de la minería, ye preciso plantegase una mengua importante de la xeneración eléctrica en centrales térmiques a carbón, pasando darréu a cuestionar dellos puntos defendíos pol sindicalista. En primer llugar, Ramos diz que la Térmica de La Perea ye "una parte mínima del parque eléctricu asturianu, xenerando menos del 2% de la corriente del país" y que ta amás fuera de les lleis y mandaos sobre emisiones contaminantes por considerase más una planta de tratamientu de residuos qu'una central eléctrica dafechu. Otramiente, Paco Ramos asegura que "nun ye preciso siguir aumentando la potencia asitiada nel sistema eléctricu español, que yá dispón del doble de lo que se precisa". Sobre l'aumentu del consumu como razón pa facer esta térmica diz l'ecoloxista qu'ha solucionase, "en cuenta de poniendo más centrales, faciendo por una meyor eficiencia y menguando'l marafundiu de corriente", un gastu de corriente que Ramos diz que "namás lleva a una perda de competitividá y a una mayor dependencia de les importaciones, tamién de les importaciones de carbón".

El representante ecoloxista asegura que, en casu de querer llevase alantre un proyectu de térmica de carbón dende Hunosa, esti "tendría de competir colos otros 150 proyectos de Centrales de Gas en Ciclu Combináu que tan preparaos en tol estáu" y que "seguramente nun tendría sentíu que fueren de carbón nunos momentos en que la Planificación Estatal ya recueye que nun van facese centrales nueves de carbón y que, pa quemar carbón nacional, hai garantía coles centrales yá existentes".