Al Uviéu cuádren-y les cuentes

El presidente del equipu carbayón Manuel Lafuente esplicó esta mañana l'alcuerdu ente l'equipu azul y la Facienda Pública pol que la normalización de les cuentes de la Sociedá Anónima Deportiva entren en camín d'iguase

La delda del Real Uviéu queda agora nunos 13 millones d'euros, a los que se-yos podríen amestar hasta otros cuatro que tan pendientes de revisión y que correspuenden a multes que tien l'equipu de la facienda pública. L'equipu va presentar pal añu qu'entra una ampliación de capital por importe de dos millones y mediu d'euros, y Lafuente comprométese a retirase dempués de tou esti procesu en casu d'apaecer un candidatu "con garantíes". D'otra manera, el conveniu d'acreedores que presentare la entidá va delles selmanes nun recibió alegación nenguna, colo que l'equipu tien ehí otru pegoyu más nel qu'aposentar la so situación económica.

La entidá azul va pagá-y cien mil euros al añu a Facienda mientres tea en Tercera, doscientos mil en Segunda B, quinientos mil en casu de llegar a Segunda, y la metada de los derechos de TV e casu de xubir a Primera. Con too y con ello, l'alcuerdu obliga a la entidá a entainar no deportivo, porque en llegando l'añu 2.009 l'equipu tien obligación de pagar mediu millón d'euros al añu tea na categoría que tea.