Al Sporting falló-y el remate col Cádiz (0-0)

Dos Sporting estremaos foron los que se vieron ayeri n'El Molinón nel partíu col Cádiz. El de la primer parte, un equipu echáu p'alantre y que buscó'l gol, que tuvo nun tris de llegar en dos ocasiones clarísimes, y el de la segunda, un equipu faltu de fondu físicu que s'empixó cola pelota y acabó poniendo de los ñervios al entrenador. Enfrente, un Cádiz que fizo bien poco pa merecer el puntu que llevó y un árbitrio que nun-yos perdonó una sola falta a los asturianos, cortando munches vegaes el xuegu del Sporting cuando más peligru tenía, ello ye, cuando l'equipu salía a la contra.

Sicasí, la primer oportunidá del partíu foi pal Cádiz, que nel minutu 3 bien pudo adelantase nuna entrada de Navarrete, qu'obligó a Roberto a facer una parada espectacular. Ehí acabó tola pólvora que traíen los andaluces, pasando darréu el Sporting a controlar el partíu y llegando nel minutu 16 la oportunidá más clara. Ismael superó al rebatiador Armando, pero'l tiru salió-y mal y dio nel poste. El rebote yera pa Gerardo, que-y dio a la pelota con tan mala suerte que'l meta andaluz alcontró la pelota casi de chiripa según se llevantaba del suelu.

El Sporting siguió tola primer parte metiéndose pel área del Cádiz, pero a los de Marcelino acabóse-yos el xuegu na segunda. Nerviosos por marcar, los xugadores del equipu asturianu nun yeren a aselar la pelota, que diba como un sputnik ensin xacíu pel prau d'el Molinón, casi siempre pela mesma banda, cosa que-y afayaba'l trabayu a la defensa gaditana. Marcelino, que se desesperó dándo-yos órdenes a los futbolistes, escosó'l cupu de cambeos, pero nin la entrada de Biagini, Casquero nin Rojas enderechó l'alloriante xuegu del equipu. Pa francer más el ritmu, los xugadores del Cádiz perdieron tol tiempu que pudieron dramatizando cada entrada de los asturianos y espurriendo los cambeos hasta la desesperación, anque'l públicu aprovechó la salida d'Oli, yá nel minutu 88, pa dedicá-y al ex - futbolista del Uviéu la tradicional "ovación"

14.000 espectadores asistieron al partíu d'ayeri, del que polo menos el Sporting sacó daqué positivo, como ye'l llevar trés partíos cola puerta a cero, ello teniendo en cuenta que Marcelino nun tien disponible a la teórica defensa titular. Con 8 puntos, l'equipu asturianu ta a trés del líder, que ye'l Xerez.