Al Farho Xixón Baloncestu atragántase-y el Lleón

Dempués d´una primera pate mui bona de los locales, qu'acabaron 9 puntos penriba y na que frenaron a los xugadores foriatos, l´equipu xixonés fundió y nun supo como atacar la zona que punxiere l´equipu lleonés amás de nun acertar coles rotaciones de los xugadores. El públicu local protestó muncho'l llabor de los árbitrios, pues al Xixón tocáron-y dos téuniques y una personal antideportiva, amás de la permisividá col contrariu nes faltes, en cuantes qu'al Farho Xixón pitáron-y 26 por 14 pa los lleoneses, amás de que nel últimu cuartu al León namás que-y pitaron una personal. Esto fizo que los lleoneses tiraren 28 tiros libres por 8 de los xixoneses. Nesti partíu nuevamente foi baxa`l capitán xixonés, Antxon Iturbe, que tovía ta mancáu. Colos lleoneses veníen tres antiguos xugadores del Farho Xixón (Borja Larragán, José López Varela y José María Panadero).


El xuegu entamó con un marcador de 0-7 pal equipu lleonés, pero dos canastes siguíes de Saúl Blanco y el gran trabayu de Keith Waleskowski, tanto n´ataque como na defensa, que firmó nesti primer cuartu 10 puntos y tres rebotes, llevaron nun primer momentu a igualar el resultáu y dempués a ponese delantre nel marcador. Hai de destacar nesti cuartu`l gran trabayu en defensa de los xixoneses y los erros nel llanzamientu esterior del C. B. Lleón, pues nun metió nin un triple de los seis intentos que fizo.
Nel segundu cuartu les coses tuvieron más igualaes, anque en dellos momentos el Farho Xixón Baloncestu marchóse nel marcador, hasta de 13 puntos, con un 35-22 nuna canasta de Rubén Suárez dempués d´una asistencia de Saúl Blanco, pero`l Lleón foi acercándose y llegóse al final del cuartu con un 37-29 pa los locales.


Na segunda parte`l partíu cambió dafechu y el Xixón fundió, pues el León ganó`l cuartu por 14-26. El so meyor xugador, Barnes, col gabitu de Pedro Rivero, echóse l´equipu al llombu y machacó l´aru xixonés amás de echa-y la galga a los pivots locales, asina llogró 10 puntos y 10 rebotes nesti cuartu, y el so equipu coyó 10 rebotes por dos de los asturianos. Entamó esti periodu con un parcial de 0-7 pal León, que se punxo a un puntu, 37-36.

El Farho Xixón reaccionó y llogró una ventaya de cinco puntos, 43-38, pero yá nun tuvo más per delantre nel marcador, pues el León púnxose, dempués de munchos minutos de dir abaxo, con un 43-44 y d´ehí la ventaya foi xorreciendo hasta llograr poner seis puntos de diferencia, 43-49. El Lleón llegó a face-y un parcial de 0-12 y al final del cuartu un triple de Rubén Suárez y una canasta de Pacreu dexaron el marcado nun 51-55.
Nel últimu cuartu l´equipu foriatu siguió per delantre nel marcador con diferencies de pocos puntos, anque cuando faltaben dos minutos foi espoxigando hasta llegar a un marcador final con 13 puntos al so favor. El Xixón nun foi a superar la zona na que se punxieren los lleonés y los sos intentos de tiru nun entraben siendo los rebotes pal equipu lleonés.


Nel FarhoXixón Baloncestu`l meyor foi Keith Waleskowski (25 puntos, 10 rebotes), tamién destacaron Rubén Suárez (10 puntos) y Saúl Blanco (8 puntos, 4 rebotes y 4 balones recuperaos). Nel C. B. León rellumó Lamond Barnes (27 puntos, 15 rebotes, 8 balones recuperaos, 3 mates y 42 de valoración), amás de Pedro Rivero (16 puntos) y Maurice Jeffers (9 puntos).