Al Crossroad fálla-y la xente de casa

La organización del festival de rock y blues convidó esta mañana a los medios de comunicación a ún recorríu pel recintu del festival, que ta llevantando con tola priesa posible los escenarios y demás instalaciones precises pa que'l xueves entame a sonar la música nos praos de la Universidá Llaboral de Xixón.

Con un cartel de restallu nel que llama l'atención la presencia por primer vegada n'España de Little Richard, el padre del Rock&Roll, o les actuaciones de grupos de sonadía como Blues Explosion o Presidents of the USA, el festival va repartir les actuaciones de los más de 180 músicos que van tomar parte nelli en dos escenarios cubiertos distintos que van alternase pa que nun pare la música en nengún momentu. Como novedá d'última hora, la fiesta de pieslle del domingu, que diba facese na discoteca "El Jardín" de Somió, va llevase a la fin a los mesmos praos de la Llaboral, onde van actuar Super Ratones y El Vez "L'Elvis Mexicanu". La representación asturiana va correr al cargu del grupu "Robbie and the Wild Trains" formación que cuenta cola participación de Juan Toraño o del omnipresente guitarrista Rafa Kas. Xunta los dos escenarios, el festival va tener serviciu de barra y instalaciones complementaries como la carpa d'alcuentros, onde van desarrollase actividaes paraleles y va contase colos materiales de la ONG ACCEM, d'ayuda a los refuxaos y desplazaos de guerra.

Cola cuenta atrás yá prendida, el festival lleva vendíes cerca de 7.000 entraes, un númberu superior al de la edición anterior pero que tampoco nun acaba de dexar conforme a la organización. Kike "Louie" responsable y promotor del festival, comentó esta mañana que mientres el públicu de fuera ta respondiendo mui bien a la convocatoria siendo'l 70% de los que mercaron abonu xente d'otres comunidaes autónomes, ye la xente de casa la que más ta fallando. Asumiendo'l fechu de que'l perfil del Crossroad nun ye'l d'un acontecimientu pa les mases, el promotor nun ye a entender el relativu desinterés del públicu asturianu por un festival que trae un cartel de gran calidá a precios mui razonables y que fai un gran esfuerzu promocional pordase a conocer y allegáse al públicu.