Aína propón diez midíes "urxentes y de fondu" pa torgar les quemes

|
Quema en Ques

El partíu asturianista defende "la prevención y un mediu rural vivu y productivu".

Aína, nel so primer comunicáu a nivel nacional, propón diez midíes, trés urxentes y siete de fondu, pa facer frente a les quemes que tán amburando'l monte del país. La formación de creación nueva recuerda que la mayoría danse ente febreru y abril, y en setiembre, el 80 por cientu provocaos, y "entá asina, los medios de los que disponemos nun son abondos, la mayoría de les persones que trabayen en prevención y estinción de quemes faenlo de manera precaria, faciendo hores extra que superen les axustaes pola llei y, en dellos casos, de forma voluntarista ensin midíes de protección llaboral afayadices".

"Abúltanos que lo más importante ye la prevención y ello pasa, tamién, pol caltenimientu y la fixación de población nel mediu rural: ensin futuru productivu nun va quedar nadie na redolada. Ensin población, nin actividá, les quemes van seguir siendo la norma nun territoriu que queda ensin nengún tipu de control nin comunitariu nin institucional". Por esti motivu demanda "aprovechar les carauterístiques naturales d'Asturies, recuperar pa los intereses de la xente que vive nos pueblos, la xestión del mediu y sofitalo too ello dende lo público, con nueves formes de producción que seyan coherentes col mediu y ayuden a la prevención de les quemes".

Una "pedagoxía y una educación basaes na xestión del territoriu, entendida ésta como una necesidá social y con participación ciudadana, consecuente" son tamién claves p'Aína, qu'insiste en que "ensin población nin actividá nel rural esto va siguir pasando. Necesitamos un mediu rural asturianu vivu y dinámicu, que nun tolere los atentaos ambientales".

Les diez midíes

"Dende Aína pidimos que se tomen midíes urxentes, non sólo na estinción de les quemes que yá se tán dando, nin na asunción de responsabilidaes penales pa quien les provoca, sinón tamién na prevención a lo llargo de too l'añu", espresen. Pa ello, proponen estes diez midíes:

Urxentes

  • Prevención a lo llargo de tol añu y llimpieza de zones de riesgu.
  • Más recursos y medios pa dar una rempuesta eficaz.
  • Caltenimientu de les plantiyes de trabayadores mientres l’iviernu.

De fondu

  • Texer aliances a nivel llocal, escuchando a vecines y productores.
  • Enfoques centraos na realidá socioeconómica y territorial asturiana.
  • Polítiques actives que permitan la producción y la vida nel rural.
  • Lleis que torguen l’usu especulativu de les quemes.
  • Apueste poles posibilidaes económiques de les roces: biomasa, madera.
  • Bones polítiques de recuperación de suelos pa l'actividá agroganadera.
  • Paisaxes en mosaicu, planificación d'usos a mediu y llargu plazu

Na imaxe, del SEPA, quema en Ques (Piloña) esta mañana, una de les zones más afeutaes.

 

Contador Estadistiques