Aína entama un actu públicu pa presentar el so programa políticu

|
Aína na manifestación XLIV Día de les Lletres Asturianes XDLA

El partíu asturianista de creación nueva, que nun participa nes eleiciones del 28-M por decisión de la militancia, sí quier aprovechar el tiempu de campaña pa facer sentir la so voz.

Un documentu con 30 llinies programátiques conforma'l programa políticu d'Aína, que la formación va presentar esti domingu nun actu públicu n'Uviéu, na sala Gong, a les 12.30 hores. Dende'l vienres, día qu'entamó la campaña eleutoral, la formación vien avanzando dellos de los puntos del mesmu baxo la etiqueta #LaÚltimaVezQueNunNosPresentamos, y nesti mitín va dar a conocer la totalidá d'ellos.

Xicu Ariza va presentar los de la estaya de 'Recuperación económica y demográfica', Ástor Llaneza y Rubén Iglesias los de 'Territoriu y ruralidá', María Fernández y Nacho Berdiales los de 'Xusticia social y servicios públicos', Elena Gutiérrez y Silvia Fernández los de 'Feminismu y derechos sociales', Claudia González y Sergio Rodríguez los de 'Identidá y desarrollu cultural', y Lluis Aique Iglesias y Óliver González los de 'Cercanía democrática y soberaníes'. Nuria García y Pelayo Martínez van conducir l'eventu, que va contar con una actuación musical a cargu de Sandra Álvarez y Claudia González.

Con esti programa Aína da un pasu más na definición del so proyeutu políticu, "basáu na xusticia social, la igualdá y el potenciamientu de les soberaníes como vía pa construyir un futuru dignu pensáu dende Asturies y p’Asturies". El partíu recuerda que'l documentu programáticu "constitúi namás una propuesta d’orientación política, na que la formación quier siguir afondando en comuña col texíu social asturianu col envís de poder ufrir na viniente cita eleutoral una alternativa madurada, tresformadora ya ilusionante".

AdxuntuTamañu
PDF icon Programa políticu Aína mayu 2023263.11 KB
Contador Estadistiques